«Tsıfrlyq QQS» jobasy iske qosylady
ASTANA. KAZINFORM – 7 qazannan bastap elimizde qosylǵan qun salyǵyn qaıtarý rásimin jeńildetetin «Tsıfrlyq QQS» jobasy iske qosylady. Qanatqaqty joba keler jyldyń sońyna deıin synaqtan ótpek. Bul týraly QR Memlekettik kirister komıteti Aýdıt departamentiniń dırektory Qadyr Ysmaǵulov aıtty.
«Tsıfrlyq qosylǵan qun salyǵy» jańa jobasyn Memlekettik kirister komıteti Ulttyq bankpen birlesip júzege asyrady. Jobany iske asyrý Memleket basshysynyń Úkimetke bergen tapsyrmalaryn oryndaý aıasynda iske asyrylady. Jobanyń negizgi maqsaty – qosylǵan qun salyǵyn qaıtarý boıynsha memlekettik qyzmetti jańǵyrtý jáne damytý. Ol úshin tsıfrlyq teńgeni qoldaný kózdelgen. Osy rette tsıfrlyq teńgege qysqasha toqtala keteıin. Búginge deıin valıýtanyń 2 túri – qaǵaz aqsha jáne banktegi qolma-qol aqshasyz túri boldy. Al tsıfrlyq teńge – ulttyq valıýtanyń jańa úshinshi túri. Onyń aldyńǵylardan negizgi aıyrmashylyǵy – esep aıyrysý fýnktsııasymen qatar qarjylyq qozǵalystardy baqylaý quraly bolýynda», - dedi departament basshysy.
Onyń aıtýynsha, qanatqaqty joba erikti negizde júrgiziledi. Joba aıasynda 55 nemese 75 jumys kúniniń ornyna 15 jumys kúniniń ishinde salyqtyq tekserý júrgizilmesten, QQS qaıtarylady. Ol úshin joba qatysýshysy QQS dep tańbalaǵan tsırflyq teńgeni Ulttyq bankten ekinshi deńgeıli bankter arqyly satyp alýy qajet. Tsıfrlyq teńgemen jasalǵan tranzaktsııalar boıynsha barlyq aqparatty, sonymen qatar ónim berýshiler men bıýdjetke túsetin túsimderge qatysty QQS qozǵalysy týraly málimetterdi Ulttyq bank Memlekettik kirister komıtetine usynady.
«Mundaı tetik memlekettik kiris organdaryna salyqtyq tekserý júrgizbesten qysqa merzimde QQS-ti qaıtarý úshin jetkilikti derekterge ıe bolýǵa múmkindik beredi», - dedi Qadyr Ysmaǵulov.
Eske sala keteıik, buǵan deıin Qazaqstanda qosylǵan qun salyǵyn tsıfrlyq teńgemen tóleýge bolatynyn jazǵan bolatynbyz.
