Tsıfrlyq keńistiktegi ómirimizdi qorǵaý týraly normany Konstıtýtsııaǵa bekitý zaman talaby — Mádı Myrzaǵaraev
ASTANA. KAZINFORM — Tsıfrlyq keńistiktegi ómirimizdi qorǵaý týraly normany Konstıtýtsııaǵa bekitý zaman talaby. Bul týraly «Referendým-2026» onlaın marafony barysynda Respýblıkalyq advokattar alqasynyń tóraǵasy Mádı Myrzaǵaraev aıtty.
— Qazir shyn máninde barlyǵymyz eki keńistikte ómir súrip jatyrmyz. Biri shynaıy ómir bolsa, ekinshisi — tsıfrlyq keńistik. Sol tsıfrlyq keńistikte tildesemiz, hat almasasyz, saýda-sattyq jasaımyz, foto jáne beıne materıaldarymyzdy, barlyq deregimizdi saqtaımyz. Demek, qazirgi ómirimiz qalaı damyp kele jatsa, tsıfrlyq keńistiktegi ómirimiz odan da qarqyndy, jyldam damyp jatyr. Ol jerde barlyq deregimiz, qujattarymyz, balalarymyzdyń foto jáne beıne materıaldary bolǵannan keıin ony qorǵaýǵa alý qajet. Sondyqtan qazirgi tsıfrlyq keńistiktegi ómirdi jáne derekterdi qorǵaý týraly normany Konstıtýtsııaǵa bekitý zaman talaby, — dedi ol.
Mádı Myrzaǵaraevtyń aıtýynsha, Konstıtýtsııa jobasynyń 21-babynda adamnyń bostandyǵy, jeke ómiri, onyń ishinde tsıfrlyq keńistegi ómiri tolyqtaı memlekettiń qorǵaýynda bolatyndyǵy jazylǵan.
— Demek, bireý týraly derekterdi jınaýǵa, saqtaýǵa, óńdeýge jáne taratýǵa tyıym salynady. Osy norma Konstıtýtsııalyq deńgeıde bekitilgennen keıin tıisti zańnamalyq normalar qabyldanady, — dedi Respýblıkalyq advokattar alqasynyń tóraǵasy.
Jańa Konstıtýtsııa jobasyn túsindirýge arnalǵan aqparattyq alań — «Referendým–2026» onlaın marafony barysynda Qazaqstan Zańgerler odaǵynyń tóraǵasy Serik Aqylbaı Konstıtýtsııa jobasy aldymen qazaq tilinde uǵynyqty jazylyp, keıin resmı tilge aýdarylǵanyn aıtqan edi.