Tsıfrlyq keńistiktegi azamattardyń quqyqtaryn qorǵaý kúsheıtiledi — Serik Aqylbaı
ASTANA. KAZINFORM — Jańa Konstıtýtsııada azamattardyń tsıfrlyq keńistiktegi quqyqtaryn qorǵaýǵa erekshe mán berilgen. Bul týraly «Qazaqstan zańgerler odaǵy» respýblıkalyq qoǵamdyq birlestiginiń tóraǵasy Serik Aqylbaı Jibek Joly telearnasynyń «Búgin LIVE» baǵdarlamasynda aıtty.
Onyń aıtýynsha, tsıfrlyq tehnologııalardyń qarqyndy damýyna baılanysty azamattardyń jeke derekterin qorǵaý ózekti máselege aınalyp otyr.
— Tsıfrlyq keńistikte adamnyń jeke málimetteriniń taralý qaýpi bar. Sondyqtan bul saladaǵy jaýapkershilik kúsheıtilip otyr. Memleket azamattarǵa zań arqyly kepildik beredi. Eger tsıfrlyq keńistikte quqyqqa qol suǵý nemese ózge de keleńsiz jaǵdaılar bolsa, azamattardyń quqyǵy zańmen qorǵalady, — dedi Serik Aqylbaı.
Spıkerdiń sózinshe, tsıfrlyq tehnologııalardyń damýy azamattardyń quqyqtaryn qorǵaý tetikterin de jetildirýdi talap etedi.
— Tsıfrlyq tehnologııalar búkil álemde qarqyndy damyp keledi. Qazaqstan da bul baǵytta aldyńǵy qatardaǵy elderdiń biri. Sondyqtan tsıfrlyq keńistiktiń damýy azamattarǵa zııan keltirmeýi kerek. Osyny eskere otyryp, Konstıtýtsııada azamattardyń quqyqtaryn qorǵaýǵa qatysty tıisti normalar kózdelgen, — dedi Serik Aqylbaı.
Aıta keteıik, buǵan deıin jańa Konstıtýtsııa jobasynda Halyq keńesine zańnamalyq bastama kóterý jáne respýblıkalyq referendým ótkizýdi usyný quqyǵy beriletini týraly jazǵanbyz.
