Tsıfrlyq Qazaqstandy aýyldar men aýyldyq okrýgtersiz qurý múmkin emes - Prezıdent
ASTANA. KAZINFORM - Prezıdent Qasym-Jomart Toqaev aýyl ákimderiniń dıalog-platformasynda aýyldyq okrýg ákimderi ózderiniń keńeıtilgen ókilettikterin tolyq iske asyryp, salyq túsimderin ulǵaıtý maqsatynda qoldanystaǵy aqparattyq platformalarmen jumys isteı bilýi qajet eknin aıtty.
- Tsıfrlyq Qazaqstandy aýyldar men aýyldyq okrýgtersiz qurý múmkin emes. Jasandy ıntellekt pen jappaı tsıfrlandyrý dáýirinde bul iske aýyl ákimderi de belsendi túrde atsalysqany jón. Eldi mekenderdi tsıfrlandyrý aýyl men qala turǵyndarynyń turmys sapasyn aıtarlyqtaı teńestiredi. Sondyqtan Úkimet bul baǵyttaǵy jumysty basty basymdyqtardyń biri retinde qarastyrýy qajet. Jergilikti jerlerden alynǵan naqty ári jedel aqparat ortalyqta tıimdi sheshimder qabyldaýǵa múmkindik beredi. Sondaı-aq ekonomıkalyq derekqor negizin qalap, resýrstardy ádil bólýge yqpal etedi. Aldaǵy úsh jylda Qazaqstandy tolyqtaı tsıfrlyq elge aınaldyrý – jańa damý kezeńindegi basty mindetterdiń biri. Bolashaqta elimizdiń álemde alatyn orny osyǵan tikeleı baılanysty. Sondyqtan muny tirshilik úshin talas desek, artyq aıtqandyq emes, - dedi Prezıdent.
Memleket basshysyórkenıet kóshinen qalmaı, tehnologııalyq jańǵyrýdy jyldamdatý qajet ekenin aıtty.
- Osy aptada Prezıdent Donald Tramp AQSh-tyń tehnologııa salasyndaǵy jahandyq ústemdigin qamtamasyz etýge arnalǵan strategııalyq bastamasyn jarııalady. Ol úshin jasandy ıntellektiniń biryńǵaı platformasy qurylady. Bul ǵylymı zerthanalardy, data ortalyqtardy, tsıfrlyq modelderdi jáne sýperkompıýter jelisin biriktiretin ulttyq aqyl-oı alańy bolmaq. Atalǵan júıe barlyq asa mańyzdy baǵyt boıynsha jańa tehnologııalar men materıaldardy ázirleýge tyń serpin beredi. Ol jartylaı ótkizgishterden bastap robotty tehnıkaǵa deıingi, ıadrolyq energetıkadan bastap bıomedıtsınaǵa deıingi salalardy túgel qamtıdy. Bul arada zertteý jobasy jaıynda emes, AQSh-ty osy salada álemdik kóshbasshyǵa aınaldyratyn tolyqqandy platforma jóninde áńgime bolyp otyr. Muny iske asyrý úshin bir jylǵa jeter-jetpes merzim berilip otyr. Sol sebepti bizge de shara qoldaný kerek. Álbette, Qazaqstan jahandyq aýqymdaǵy kóshbasshylyqqa talaspaıdy. Biraq órkenıet kóshinen qalmaı, tehnologııalyq jańǵyrýdy jyldamdatý qajet. Oılanyp-tolǵanyp júrýge ýaqyt az, - dedi Prezıdent.
Memleket basshysy salyq-bıýdjet úderisterin jetildirýge qatysty birqatar usynys aıtty.