Tsıfrlyq qarjy aktıvteriniń aınalymyna arnalǵan ulttyq saýda platformasy iske qosylmaq
ASTANA. KAZINFORM – 2030 jylǵa deıingi saqtandyrý jáne qor naryǵyn damytý baǵdarlamasy ázirlenedi. Bul týraly Senattyń jalpy otyrysynda Ulttyq bank tóraǵasy Tımýr Súleımenov aıtty.
- Qarjylyq retteý agenttigimen birlesip, 2030 jylǵa deıingi saqtandyrý jáne qor naryǵyn damytý baǵdarlamasyn ázirleımiz. Osy jumystyń qorytyndysy boıynsha agenttik pen Ulttyq bank saqtandyrý jáne baǵaly qaǵazdar naryǵy týraly eki jańa zań ázirleıdi. Qarjy aktıvterin tokendeý múmkindigin qamtamasyz ete otyryp, tsıfrlyq qarjy aktıvteriniń aınalymyna arnalǵan ulttyq saýda platformasyn iske qosýdy josparlap otyrmyz, - dedi Tımýr Súleımenov Úkimettiń ótken jylǵy respýblıkalyq bıýdjettiń atqarylýy týraly esebin talqylaý barysynda.
Onyń málimetinshe, lıtsenzııalanǵan tsıfrlyq aktıvter qyzmetiniń provaıderleri arqyly ulttyq tsıfrlyq aktıvter ınfraqurylymy aıasynda krıptoaktıvterdiń zańdy aınalymyn 20 mlrd dollarǵa deıin arttyrý kózdeledi.
- Bul qadamdar qarjy júıesiniń, ekonomıkanyń jáne elimizdiń sapaly ári turaqty damýyna mańyzdy úles qosatynyna senimdimiz. Bizdiń basty maqsatymyz – ınflıatsııany tómendetip, ulttyq ekonomıkany ártaraptandyrýdy qamtamasyz etý, azamattardyń naqty tabysyn arttyryp, otandyq kásipkerler men ınvestorlar úshin aıqyn jáne qolaıly orta qalyptastyrý, - dedi Ulttyq bank tóraǵasy.
Aıta keteıik, 2025 jyly elimizdiń altyn-valıýta rezervteri 42,8 paıyzǵa ósti.
