Tsıfrlyq karta bızneske suranys bar aýmaqtardy anyqtaýǵa múmkindik beredi – Áset Turysov
ASTANA. KAZINFORM – Memlekettik qarjynyń tsıfrlyq kartasy saýda salasyn taldaýdy jaqsartyp, kásipkerlerge naryqtaǵy múmkindikterdi anyqtaýǵa kómektesedi. Bul týraly Qarjy vıtse-mınıstri Áset Turysov Ortalyq kommýnıkatsııalar qyzmetindegi brıfıngte aıtty.
Onyń sózinshe, tsıfrlyq karta kassalyq tártip, qarjy aǵyndary jáne chekterdiń berilýi týraly derekter negizinde qalyptastyrylady.
Júıe usynylǵan málimetterdiń shynaıylyǵy men chekterdiń berilý tıimdiligin taldaýǵa múmkindik beredi.
- Chekterdiń berilýi qanshalyqty tıimdi, usynylǵan málimetter qanshalyqty shynaıy – munyń bárin júıe arqyly saralaýǵa bolady. Bul tek ákimshilendirý quraly emes, jasandy ıntellekt kómegimen saýda salasyndaǵy taldaýdy damytýǵa múmkindik beredi, – dedi ol.
Áset Turysov jasandy ıntellektiniń shaǵyn jáne orta bıznes úshin de mańyzdy ekenin atap ótti.
- Chekter men elektrondyq shot-faktýralar derekterin taldaý arqyly belgili bir aýmaqta dárihana nemese naýbaıhana ashýǵa suranys bar-joǵyn aldyn ala baǵalaýǵa bolady, – dedi vıtse-mınıstr.
Mınıstrlik bul qural bızneske sheshim qabyldaýdy jeńildetip, naryq múmkindikterin tıimdi paıdalanýǵa kómektesetinin málimdedi.
Buǵan deıin bólip tóleýge qosylý úshin bıznes qandaı tekseristen ótetini týraly jazdyq.
