«Tsıfrlyq ınvestıtsııalyq moneta» jobasy qashan iske qosylady
ALMATY. KAZINFORM – Qazaqstan Ulttyq Banki ulttyq valıýta – teńge kúniniń qurmetine oraı 2025 jyldyń I toqsanynda jańa «Tsıfrlyq ınvestıtsııalyq moneta» jobasyn iske qosýdy josparlap otyr.
Ulttyq bank málimetinshe, altyn ınvestıtsııalyq monetalardy kez kelgen ýaqytta jáne álemniń kez kelgen núktesinen online satyp alýǵa jáne satýǵa bolady.
«Tsıfrlyq balamadaǵy ınvestıtsııalyq monetanyń quny LBMA (London baǵaly metaldar naryǵyna qatysýshylardyń qaýymdastyǵy) belgilegen altynnyń salmaǵy men baǵasyna saı jáne Ulttyq Bank belgilegen AQSh dollarynyń teńgege shaqqandaǵy aıyrbas baǵamy negizinde teńgemen esepteletin bolady», - dep habarlady vedomstvodan.
Monetalar Astana International Exchange (AIX) bırjasynyń «TABYS» mobıldi qosymshasy arqyly satylady.
«Tsıfrlyq ınvestıtsııalyq moneta» jobasy aıasynda monetalardy satyp alýǵa, Ulttyq Bankke keri satýǵa, syılaýǵa, sondaı-aq olardyń jetkilikti sany jınaqtalǵan kezde Ulttyq Banktiń aýmaqtyq fılıaldarynda zattaı altyn ınvestıtsııalyq monetaǵa aıyrbastaýǵa bolady», - delingen habarlamada.
Osy joba úshin arnaıy jańa ÚKI ınvestıtsııalyq monetasynyń eksklıýzıvti dızaıny ázirlenip jatyr. Onyń salmaǵy 31,1 gramm, nomınaly 100 teńge, altyn synamasy – Au 999,9.
Moneta «Kóshpendilerdiń ǵıbadat janýarlary – totemderi» serııasyndaǵy kollektsııalyq monetalar stılinde jasalǵan. ÚKI ınvestıtsııalyq monetasyn tek «TABYS» mobıldi qosymshasy arqyly satyp alýǵa bolady.
Monetalar blısterde shyǵarylady.
Joba naqty qaı kúni iske qosylatyny týraly aqparat Ulttyq Banktiń resmı ınternet-resýrsynda qosymsha jarııalanatyn bolady.
