Tsıfrlyq ıntellektýaldy elektr jelilerin damytý jobasy pysyqtaldy
ASTANA. KAZINFORM – Energetıka mınıstrligi Birikken Ulttar Uıymynyń Damý baǵdarlamasymen (BUUDB) birlesip tsıfrlyq ıntellektýaldy elektr jelilerin damytý jáne elektr energııasyna suranysty basqarý tetikterin engizý jónindegi jobalyq bastamany pysyqtaýǵa kiristi.
Astana qalasynda Energetıka mınıstrliginiń, BUUDB-nyń, «KEGOC» AQ-nyń, Memlekettik energetıkalyq qadaǵalaý jáne baqylaý komıtetiniń ókilderi, sondaı-aq halyqaralyq jáne ulttyq sarapshylardyń qatysýymen jumys kezdesýleri ótti.
Іs-shara «Suranysty basqarý» (Demand-driven Digital Smart Grids) birlesken jobasyn ázirleý aıasynda uıymdastyryldy. Jobanyń negizgi maqsaty – zamanaýı tsıfrlyq tehnologııalar men suranysty basqarý quraldaryn engizý arqyly Qazaqstannyń elektr energetıkalyq júıesiniń jumys tıimdiligin arttyrýǵa jaǵdaı jasaý.
Talqylaý barysynda elektr energııasy naryǵyndaǵy agregatorlar ınstıtýtyn damytý, tutynýshylardyń tsıfrlyq profılderin qalyptastyrý, tutynýshylardy suranysty basqarý baǵdarlamalaryna qatystyrý úshin ekonomıkalyq yntalandyrý tetikterin engizý, derekterdi óńdeý men qorǵaýdyń zamanaýı júıelerin paıdalaný, sondaı-aq belsendi elektr energııasyn tutynýshy tujyrymdamasyn damytý máseleleri qarastyryldy. Atalǵan tásilderdi iske asyrý energııa júıesiniń ıkemdiligin arttyrýǵa, eń joǵary júkteme kezeńderindegi tutynýdy tómendetýge, jańartylatyn energııa kózderin, energııa jınaqtaý júıelerin jáne ózge de zamanaýı energetıkalyq tehnologııalardy tıimdi ıntegratsııalaýǵa múmkindik beredi.
Energetıka mınıstrligi ıntellektýaldy jelilerdi damytý men elektr energetıkasyn tsıfrlandyrýdy salany jańǵyrtýdyń mańyzdy baǵyttarynyń biri retinde qarastyrady. Sonymen qatar joba energııamen jabdyqtaýdyń senimdiligin arttyrýǵa, tsıfrlyq ınfraqurylymdy damytýǵa jáne energetıka salasynyń kıberqaýipsizdigin nyǵaıtýǵa yqpal etedi.
Kezdesý qorytyndysy boıynsha taraptar jobalyq qujatty ázirleýdiń kelesi qadamdaryn aıqyndady. Bul qujat Qazaqstan elektr energetıkasyn tsıfrlyq transformatsııalaý salasyndaǵy birlesken bastamalardy iske asyrýdyń negizi bolmaq.
Aıta keteıik, Batys Qazaqstandaǵy zaýytty shıkizatpen qamtý máselesine Energetıka mınıstrligi pikir bildirdi.
