Tsıfrlyq ınklıýzııa: Azııa jáne Tynyq muhıty óńiriniń 30-dan astam mınıstri Astanada bas qosty
ASTANA. KAZINFORM – Astanada tsıfrlyq ınklıýzııa jáne transformatsııa boıynsha Ortalyq Azııadaǵy alǵashqy Azııa-Tynyq muhıty mınıstrlik konferentsııasy bastaldy. Onda 30-dan astam eldiń tsıfrlyq damý kóshbasshylary bas qosýda.
Aýqymdy jıyndy BUU Azııa jáne Tynyq muhıty óńirine arnalǵan ekonomıkalyq jáne áleýmettik komıssııasy uıymdastyrǵan. Qazaqstanda ATMEÁK-nyń konferentsııasyn ótkizý usynysy 79-shy sessııada barlyq múshe memleketterdiń biraýyzdan qoldaýyna ıe boldy, bul eldiń óńirdegi tsıfrlyq tehnologııalar men turaqty damýdy ilgeriletýdegi mańyzdy rólin atap kórsetedi.
Sharanyń ashylý saltanatynda QR Premer-Mınıstri Oljas Bektenov Azııa Tynyq muhıty óńirine arnalǵan ekonomıkalyq jáne áleýmettik komıssııa 80 jylǵa jýyq ýaqyt boıy osy aımaqtaǵy 4 mıllıardtan astam adamnyń ómirine aıtarlyqtaı áser etip otyrǵanyn jetkizdi.
«Qazaqstan 30 jyldan astam ýaqyt boıy Azııa Tynyq muhıty óńirine arnalǵan Ekonomıkalyq jáne áleýmettik komıssııaǵa tolyqqandy múshe bolyp otyr. Oǵan qosa, biz úzdik álemdik tájirıbe negizinde seriktestik jáne tatý kórshilik qarym-qatynastar rýhynda serpindi damýdy jalǵastyryp kelemiz. Osy jyldary biz qorshaǵan ortany qorǵaý, tabıǵı resýrstardy basqarý, ınvestıtsııalyq baılanystar, saýda, energetıka jáne kólik sııaqty mańyzdy baǵyttarda qarym-qatynasty damyta aldyq», - dedi O. Bektenov.
Prezıdent Qasym-Jomart Toqaev tsıfrlyq tehnologııalar ekonomıkalyq ósýdi qamtamasyz ete otyryp, mıllıondaǵan adamdarǵa bıznes, bilim berý jáne densaýlyq saqtaý salasynda jańa kókjıekterdi ashýǵa múmkindik berip otyrǵanyn atap kórsetken edi.
Búgingi tańda Qazaqstan álemdegi tsıfrlyq damý jaǵynan eń ozyq 30 memlekettiń qataryna kiredi jáne onlaın qyzmetter boıynsha 8-shi orynda. Barlyq memlekettik qyzmetterdiń 90%-dan astamy mobıldi qurylǵylardan halyqqa qoljetimdi.
«Qazaqstan tsıfrlyq Jibek jolyn damytý sheńberinde kórshilermen birge Parsy shyǵanaǵy elderine shyǵyp, Kaspıı teńiziniń túbine talshyqty-optıkalyq baılanys jelilerin tóseý, sondaı-aq Batys-Shyǵys jobasy boıynsha tranzıttik áleýetti odan ári keńeıtý jónindegi jobany iske asyrýda. Bul jańa tehnologııalardy damytý, iri Big Tech kompanııalaryn tartý úshin derekterdi jınaý, saqtaý jáne óńdeýdiń zamanaýı ınfraqurylymyn qalyptastyrýǵa múmkindik beredi», - dedi Premer-Mınıstr.
Konferentsııanyń alǵashqy eki kúninde plenarlyq talqylaýlar, qosymsha is-sharalar jáne mınıstrler arasyndaǵy ekijaqty kezdesýler ótip, memorandýmdar men kelisimderge qol qoıylady.
Konferentsııanyń sońǵy kúni – 5 qyrkúıekte bolatyn Kazakhstan Tech Solution Day sheńberinde IT-kompanııalar, startaptar men Qazaqstannyń SmartBridge, Smart Data Ukimet, eOtinish sııaqty ozyq tsıfrlyq ázirlemeleri tanystyrylady. Sonymen qatar Ortalyq Azııadaǵy eń iri ınnovatsııalyq ortalyq – Astana Hub halyqaralyq tehnoparkiniń múmkindikteri de tanystyrylady.
