Tsıfrlyq dáýirdegi ustaz qandaı bolý kerek – Muǵalim-ınnovator
ASTANA. KAZINFORM – Burynǵy zamanda muǵalimniń negizgi quraly – bor men taqta bolsa, búgingi tsıfrlyq dáýirde bul tizimge noýtbýk pen ınternet, tipti jasandy ıntellekt qosyldy. Alaıda tehnologııanyń qaryshtap damýy ustazdar qaýymyna jańa talaptar júktep otyr. Jasandy ıntellektini sabaq barysynda qalaı tıimdi qoldaný kerek? Muǵalimderdiń qaǵazbastylyqtarynan arylýyna neırojeliler qalaı kómektesedi? Osy suraqtar tóńireginde Jibek Joly telearnasynyń «Búgin.LIVE» baǵdarlamasynda 10 myńnan astam ustazdy tsıfrlyq saýattylyqqa baýlyǵan muǵalim-ınnovator Temirbek Saǵyndyqov jaýap berdi.
Kóptegen muǵalimder JI platformalarynyń aǵylshyn tilinde bolýyn úlken kedergi dep sanaıdy. Biraq ınnovator muǵalimniń aıtýynsha, kez kelgen resýrsty qazaq tiline aýdaryp, ıkemdep alýǵa múmkindik bar. Eń bastysy – JI-ge durys suraq qoıa bilý, ıaǵnı «promt» jazý daǵdysyn meńgerý.
– Eger muǵalim JI-ge saýaldy naqty ári saýatty qoıa bilse, sońynda sapaly materıal alady. Biz ustazdarǵa «Muǵalimniń jumys paraqshasy generatory» sııaqty arnaıy júıelermen jumys isteýdi úıretemiz. Bul neırojeliler sabaq josparyn, kórnekilikter men deńgeılik tapsyrmalardy az ǵana ýaqytta daıyndap beredi. Nátıjesinde muǵalim qaǵaz bastylyqtan arylyp, bosaǵan ýaqytyn balanyń tárbıesine, olarmen tikeleı jumys isteýge arnaı alady, – deıdi Temirbek Saǵyndyqov.
Sonymen qatar bilim salasyndaǵy eń aýyr máseleniń biri – aýyl men qala mektepterindegi sapa alshaqtyǵy. Temirbek Saǵyndyqovtyń paıymdaýynsha, dál osy JI – bul máseleniń ońtaıly sheshimi.
– JI-diń múmkindikteri aýyl men qala bilimin teńestirýge qaýqarly. Eger aýyl muǵalimi promt jazýdy meńgerse, qymbat qurylǵysyz-aq vırtýaldy zerthanalar, onlaın stımýlıatsııalar men ınteraktıvti platformalar arqyly oqýshyǵa zamanaýı bilim bere alady. AQSh-ta júrgizilgen zertteýlerge súıensek, JI men ınnovatsııalardy qoldanatyn muǵalimder óz jumysyna senimdirek bolady eken, – dep atap ótti ınnovator.
Bul tusta kóptegen ata-analar «balamyz tapsyrmany JI-den daıyn kúıinde kóshirip alady» dep alańdaıdy. Alaıda mamannyń aıtýynsha, tehnologııadan qashqannan eshteńe utpaımyz. Kerisinshe, tapsyrmalardyń mazmunyn ózgertý kerek.
– Oqýshynyń JI qoldanýynan qorqýdyń keregi joq, ony durys, saýatty paıdalanýdy úıretýimiz qajet. Qazir tapsyrmalardyń formaty ózgerýi tıis. Eger muǵalim tsıfrlyq quraldardy qoldana otyryp oryndalatyn kreatıvti tapsyrmalar berse, oqýshy JI-di kómekshi qural retinde paıdalanyp, óz jobasyn jasaıdy. Iá, JI qate jiberýi múmkin, sondyqtan pán muǵalimi generatsııalanǵan materıaldy mindetti túrde tekserip, ústinen qarap shyǵýy tıis, – dep túıindedi ol.
Aıta keteıik, buǵan deıin, qyrǵyzstandyq sarapshylar JI Qazaqstandaǵy bilim sapasyn arttyratynyn aıtqan bolatyn.
