Tsıfrlyq dáýir qaýip-qaterge toly bolsa da, maqsat-muratymyz ózgermeıdi — Memleket basshysy
ASTANA. KAZINFORM — Jasandy ıntellektige negizdelgen tsıfrlyq ekonomıka qurýymyz qajet. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
— Bıyl Tsıfrlandyrý jáne jasandy ıntellekt jyly aıasynda biz ozyq ári tehnologııalyq turǵydan damyǵan memleket qurý isine serpin berdik. Endi bul jumysty ári qaraı júıeli jalǵastyryp, jasandy ıntellektige negizdelgen tsıfrlyq ekonomıka qurýymyz qajet. Úkimet, ulttyq kompanııalar, kreatıvti ındýstrııa sektory osy úderiske belsendi atsalysýǵa tıis, — dedi Qasym-Jomart Toqaev.
Prezıdent paıymynsha, bul — jańa dáýirdiń talaptaryna tolyq saı keletin asa mańyzdy jalpyulttyq mindet.
Bolashaqtyń ekonomıkasyn qurý úshin taptaýryn túsinikter men eskirgen tásilderden birjola arylýymyz qajet.
— Qoǵam damýynyń múlde jańa negizin qalyptastyrýymyz kerek. Shyn máninde, muny ozyq tehnologııalar zamanynda óskeleń urpaqtyń laıyqty ómir súrýine jol ashatyn uzaq merzimge arnalǵan jalpyulttyq mıssııa deýge bolady. Tsıfrlyq dáýir qanshalyqty kúrdeli, qıyn, tipti qaýip-qaterge toly bolsa da, bizdiń maqsat-muratymyz ózgermeıdi. Bul — jańa turpatty memleket qurý, jańǵyrý men jańarý jolynan aınymaý, — dedi Memleket basshysy.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
