Tsıfrlyq dáýir arhıvterge adamzattyń ortaq jadyn saqtaý mindetin júktep otyr — ıÝNESKO ókili
ASTANA. KAZINFORM — Búgin Astanada Halyqaralyq arhıvter kúnine oraı «Digital Archive EXPO» III Halyqaralyq arhıvshiler kongresi ótip jatyr.
Forýmda sóz alǵan ıÝNESKO-nyń Qujattyq mura bóliminiń basshysy Fakson Banda tsıfrlyq arhıvterdiń mańyzyn jáne jasandy ıntellekt pen dezınformatsııa dáýirindegi jańa syn-qaterlerge toqtaldy. Ol Qazaqstannyń álemdik qujattyq murany saqtaýdaǵy rólin erekshe atap ótti.
— Qazaqstannyń qujattyq murasy óte baı ekenin erekshe aıtqym keledi, onyń bir bóligi «Álemdik jady» baǵdarlamasynyń halyqaralyq tizimine jahandyq mańyzy bar mura retinde engizilgen, — dedi ıÝNESKO ókili.
Onyń aıtýynsha, qazirgi tańda búkil álemdegi arhıv mekemeleri túrli qaýip-qaterlermen betpe-bet kelip otyr.
— Máselen, arhıvter tabıǵı jáne tehnogendik apattar saldarynan qundy derekterden aıyrylyp qalý qaýpi sııaqty túrli syn-qaterlerge tap bolyp jatyr. Sondyqtan olardy saqtaýdyń senimdi joldarynyń biri — qujattardy tsıfrlyq formatqa kóshirý, — dedi bólim basshysy.
Degenmen, jasandy ıntellekt arhıvterdi tsıfrlyq túrde saqtaý úshin úlken múmkindikter usynǵanymen, ol saıasatkerler, arhıv mekemeleri jáne azamattyq qoǵam úshin de kúrdeli syn-qaterler týyndatýy múmkin ekenin de jasyrǵan joq.
— Jalǵan aqparat pen dezınformatsııa áleminde arhıvtik qujat aqıqattyń kózi bolyp qala ala ma? Jasandy ıntellekt dáýirinde aqıqat degen ne? Mine, álemdik qaýymdastyq osyndaı saýaldar tóńireginde oılanýy tıis, — dep atap ótti Fakson Banda.
Sol sebepti, onyń aıtýynsha, arhıv salasyndaǵy ózekti máselelerdi sheshýdiń basty joly — halyqaralyq yntymaqtastyq pen tájirıbe almasý.
Aıta keteıik, búgin Astanada ótip jatqan III Halyqaralyq arhıvshiler kongresine álemniń 30 elinen 500-den astam maman qatysyp jatyr.
Buǵan deıin BUU ókili tsıfrlyq arhıvter dáýirinde derekterdiń shynaıylyǵy men qaýipsizdigin saqtaý talaptary kúsheıgenin atap ótken edi.
