Tsıfrlyq damý mınıstrligi gazet-jýrnal taratý qyzmetin basqa mınıstrlikke bermekshi

ASTANA. KAZINFORM – Májiliste «Qazposhta» qyzmetin damytýǵa arnalǵan zań jobasy talqylanyp jatyr. Іs-shara kezinde gazet-jýrnaldardy taratý sýbsıdııasynyń kúrt qysqarǵany belgili boldy.

Depýtat Amanjol Áltaı «Qazposhtanyń» basylymdardy jetkizý shyǵynyn sýbsıdııalaý fýnktsııasyn Mádenıet jáne aqparat mınıstrliginiń quzyretine berý týraly másele kóterdi.

Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek bul usynysty qoldaıtynyn aıtty.

«Buryn bizdiń mınıstrlik Mádenıet mınıstrligimen biriktirilgen bolatyn. Bir mınıstrlik bolǵandyqtan sýbsıdııany birden berdik. Qazir eki mınıstrlik bólek-bólek shyqtyq. Sondyqtan osy basylymdardy taratý qyzmetterin negizinde Mádenıet jáne aqparat mınıstrligi ózine alý kerek. Men solaı oılaımyn», - dedi vıtse mınıstr.

Onyń sózinshe, sońǵy bir jylda gazet-jýrnal tasymalynyń sýbsıdııasy 3 ese qysqaryp qalǵan.

«Biz jyl saıyn bıýdjetten 10 mlrd teńgedeı qarajat alatynbyz. Ony túgel sýbsıdııaǵa beremiz. Biraq bıyl bizge 3 mlrd teńge ǵana berildi. ıAǵnı, basylymdardy jetkizý sýbsıdııasynyń kólemi bizge baılanysty emes», - dedi Ashat Orazbek.