Tsıfrlyq damý mınıstrligi alǵashqy Digital Nomad Residency ıegeriniń esimin jarııalady
ASTANA. KAZINFORM – Qazaqstanda alǵash ret Digital Nomad Residency berildi. Bul mártebege halyqaralyq tájirıbesi bar Senior Analytics & BI Engineer Pavel Fılatov ıe boldy. Ol Qazaqstandy qolaıly ómir súrip, kásibı qyzmetin jalǵastyrýǵa yńǵaıly el retinde tańdaǵan.
2025 jyldyń qańtarynda Memleket basshysy Qasym-Jomart Toqaevtyń tapsyrmasymen iske qosylǵan baǵdarlama az ýaqyttyń ishinde tsıfrlyq tehnologııalar men jasandy ıntellekt salasyndaǵy álem boıynsha úzdik mamandardy tartýdyń mańyzdy quralyna aınaldy. Elde turýǵa yqtııarhat alý protsesi onlaın formatta Astana Hub halyqaralyq ınnovatsııalyq klasteriniń platformasynda bastalady. Odan keıin Astana Hub mamandary ótinish berýshilerdi ár kezeńde súıemeldep, zańnamaǵa sáıkes rásim tolyq aıaqtalǵanǵa deıin keńes beredi.
Búginde AQSh, Kanada, Frantsııa, Túrkııa jáne TMD elderin qosa alǵanda, 20 memleketten 270-ten astam ótinim tústi. Ótinish berýshilerdiń basym bóligi baǵdarlamalaý, kıberqaýipsizdik, UI/UX-dızaın jáne DevOps mamandary.
Buǵan deıin Digital Nomad Visa aıasynda alǵashqy qatysýshylar – Aljır men Botsvananyń IT-mamandary Qazaqstanǵa kelip úlgergen. Bul vıza tabysty rastaýdy talap etpeıdi, elge kirýdi jeńildetedi jáne sheteldik te, otandyq ta kompanııalarmen jumys isteýge múmkindik beredi. Sonymen qatar, vızanyń qoldanylý merzimi ishinde onyń ıegerleri Digital Nomad Residency alýǵa ótinish bere alady.
Al Digital Nomad Residency-diń alǵashqy uzaqmerzimdi mártebesi baǵdarlamanyń tıimdiligin jáne aımaqtyq tsıfrlyq hab retinde Qazaqstanǵa degen qyzyǵýshylyqtyń artyp kele jatqanyn kórsetedi.
– Digital Nomad Residency maǵan jaıly ómir súrý múmkindigin qarqyndy damyp jatqan tehnologııalyq ekojúıemen ushtastyrýǵa jol ashty. Rásimniń zamanaýı ári yńǵaıly júrgiziletinin erekshe atap ótkim keledi. Bul baǵdarlama IT-mamandarǵa jańa múmkindikterge jol ashady. Qazaqstan kásibı turǵyda damý men halyqaralyq áriptestik úshin zor áleýetke ıe. Alǵashqy rezıdent ataný men úshin úlken mártebe, - dedi Digital Nomad Residency ıegeri Pavel Fılatov.
Aıta keterligi, Digital Nomad Visa jáne onyń jalǵasy bolyp tabylatyn Digital Nomad Residency baǵdarlamalary jasandy ıntellekt, Big Data, avtomattandyrý jáne aqparattyq qaýipsizdik baǵyttaryndaǵy «tsıfrlyq kóshpendilerdi» tartýǵa baǵyttalǵan.
Alǵashqy Digital Nomad Residency rásimdelýi – jaı ǵana resmı qujat emes, bul Qazaqstannyń álemdik IT-mamandarǵa ashyqtyǵynyń belgisi ári eldiń óńirlik tehnologııalyq hab retindegi mártebesin nyǵaıtý jolyndaǵy mańyzdy qadam.