Tsıfrlyq damý mınıstri Egov-ke qatysty qaýesetke jaýap berdi

ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Qazaqstan Egov portalynan bas tartady degen qaýesetke jaýap berdi.

Buǵan deıin BAQ-ta reseılik kompanııa eGov portalyna balama retinde QR Úkimeti úshin tsıfrlyq platforma ázirleıtini habarlaǵan bolatyn.

- Bul aqparat shyndyqqa janaspaıdy. Sondyqtan ony teriske shyǵaramyn. Egov – bizdiń azamattarymyzǵa myńnan astam qyzmetti yńǵaıly túrde alýǵa múmkindik beretin óte tanymal tetik. Ózderińiz biletindeı, qazir memlekettik qyzmetterdiń 90%-dan astamyn onlaın rejımde alýǵa bolady. Atap aıtqanda, Egov-ty toqtatýǵa jol bere almaımyz. Egov - memlekettik qyzmetterdi alýdyń mańyzdy quraly, klıentterge barynsha yńǵaıly formatta qyzmet kórsetýge múmkindik berip otyr, - dedi J. Mádıev Parlament palatalarynyń birlesken otyrysy aldynda tilshiler suraǵyna jaýap bere otyryp.

Onyń aıtýynsha, búginde reseılik kompanııaǵa qatysy joq otandyq «Qazteh» platformasy ázirlenip jatyr.

- Ol elimizge arnalyp jasalyp otyr. Bul óz kezeginde mıkroservıs arhıtektýrasy bazasynda aqparattyq júıelerdi daıarlaýǵa múmkindik beretin tetik. Jalpy, bul baǵytta qazaqstandyq mamandardyń ózderi jumys istep jatqanyn senimmen aıta alamyn, - dedi mınıstr.

Aıta keteıik, endi kámeletke tolǵan azamattarǵa qamqorshylar týraly tsıfrlyq qujatty eGov Mobile qosymshasynan alýǵa bolady.