Tsıfrlyq damý mınıstri aýyldarǵa ınternet tartý jumystaryna túsinik berdi
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aýyldarǵa ınternet tartýǵa qatysty túsinik berdi.
Búgin Senattyń jalpy otyrysynda senatorlar joǵary jyldamdyqty ınternet boıynsha shaǵyn eldi mekenderde problemalar áli sheshilmegenin aıtty. Osy oraıda avtojol boıyndaǵy jáne eldi mekenderdegi uıaly baılanys ári ınternet máselesin sheshýge qatysty qandaı jumystar atqarylyp jatqanyn surady.
Óz kezeginde J.Mádıev qazir 6 200-den astam aýyl bar ekenin, 3G jáne 4G baılanys jelisi 4 myńnan astam aýylda qosylǵanyn aıtty. ADSL tehnologııasy boıynsha symdy ınternet jáne talshyqty-optıkalyq jeli arqyly ınternet 2 myńǵa jýyq aýylda bar.
«2027 jylǵa deıin 3 myńnan astam aýylǵa optıkalyq ınternet jetkiziledi. Sonyń ishinde 1 400-den astam aýylǵa mobıldi ınternet te tartylady. Baılanys operatorlarynyń lıtsenzııalyq mindettemelerinde bul aýyldardy ınternetpen qamtamasyz etý eskeriledi», - dedi mınıstr.
Eske salsaq, bıyl maýsym aıynda Premer-Mınıstr Oljas Bektenov 2027 jylǵa qaraı eldi mekender men joldardy baılanys jelilerimen qamtý 100 paıyzǵa jetetinin aıtty.
