Tsıfrlyq aktıvterge qatysty jańa quqyqtyq aktiler ázirlenip jatyr – Memlekettik kirister komıteti

ASTANA. KAZINFORM – Qazaqstanda jańa Salyq kodeksi aıasynda tsıfrlyq aktıvterdi retteýge baǵyttalǵan birneshe normatıvtik quqyqtyq akt (NQA) ázirlenip jatyr. Bul týraly Memlekettik kirister komıtetiniń Tsıfrlyq aktıvterdi ákimshilendirý basqarmasynyń basshysy Talǵat Ádilov tikeleı efır barysynda aıtty.

– Jańa Salyq kodeksi sheńberinde bizde tsıfrlyq aktıvterdiń qunyn tanýǵa baılanysty NQA bar. Buǵan deıin bul tizimde 11 ǵana tsıfrlyq aktıv bolsa, qazir ony keńeıtip, 114 aktıvke deıin jetkizdik. Bul – ortasha saralanǵan qundardy esepteý úshin qajet, – dedi komıtet ókili.

Onyń aıtýynsha, tsıfrlyq aktıvter naryǵyndaǵy úderisterdi eskere otyryp, birqatar jańa qujattar ázirlenip, qabyldaý satysynda tur.

– Sonymen qatar bizde krıptovalıýta bırjalarymen aqparat almasý, Astana halyqaralyq qarjy ortalyǵyna qatysý, maınıng pýldarmen derekterdi bólisý boıynsha da normatıvtik quqyqtyq aktiler bar. Bul maınerler óndirip alǵan tsıfrlyq aktıvterdi esepke alý maqsatynda qajet. Atalǵan qujattar qazirgi ýaqytta ázirleý jáne qabyldaý satysynda tur. Barlyq jumys naryq ókilderimen birlesip, olardyń usynystaryn eskere otyryp júrgizilip jatyr, – dedi Talǵat Ádilov.

Ol sonymen qatar tsıfrlyq aktıvter salasynyń qarqyndy damyp jatqanyn atap ótti.

– Tsıfrlyq quraldardyń qoldaný aýqymy únemi ózgerip, jańa tabys alý múmkindikteri, jańa tehnologııalar paıda bolyp jatyr. Osy sebepti biz naryqtaǵy ózgeristerdi ýaqytyly baqylap, salyqtyq jáne quqyqtyq retteýdi únemi jańartyp otyrýymyz qajet, – dep túıindedi komıtet basshysy.

Buǵan deıin 2026 jyldan bastap tsıfrlyq aktıvterge salynatyn salyqqa ózgerister engiziletinin jazǵanbyz.