Tsıfrlyq aktıvterdiń memlekettik qoryn qurǵan jón — Prezıdent

ASTANA. KAZINFORM — Krıptoaktıvterge basa nazar aýdarý kerek. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty. 

— Tsıfrlyq aktıvterdiń tolyqqandy ekojúıesin tezirek qalyptastyrǵan jón. Tsıfrlyq teńgeniń engizilýi bul jumysqa septigin tıgizip jatyr. Qazirgi tańda jobalardy Ulttyq qor esebinen qarjylandyrý kezinde tsıfrlyq teńgeni qoldanyp júrmiz. Endi onyń qoldaný aıasyn odan ári keńeıtý qajet. Tsıfrlyq teńgeni respýblıkalyq jáne jergilikti bıýdjette, memlekettik holdıngterdiń bıýdjetinde paıdalanýǵa bolady, — dedi Qasym-Jomart Toqaev.

Prezıdenttiń aıtýynsha, qazirgi zamannyń talabyn eskere otyryp, krıptoaktıvterge basa nazar aýdarý kerek. Ulttyq banktiń ınvestıtsııalyq korporatsııasy negizinde Tsıfrlyq aktıvterdiń memlekettik qoryn qurǵan jón. Bul qurylymda jańa tsıfrlyq qarjy júıesindegi bolashaǵy zor aktıvterden quralǵan strategııalyq krıptorezerv jınaqtalady.

— Jappaı tsıfrlandyrýdyń, sonyń ishinde bank salasyn tsıfrlandyrý isiniń paıdasy kóp ekeni sózsiz. Biraq, onyń qaýip-qateri de az emes. Sońǵy jyldary onlaın-alaıaqtyq memlekettiń jáne azamattardyń qarjylyq qaýipsizdigine úlken nuqsan keltirip jatyr. Sondyqtan, kıber-qylmyspen kúresý úshin antıfrod ortalyǵy quryldy. Bıometrııalyq anyqtaý júıesi engizildi. Bankterdiń, mıkro-qarjy uıymdary men baılanys operatorlarynyń jaýapkershiligi kúsheıdi. Degenmen, bul máselege únemi jiti nazar aýdarý qajet. Quzyrly organdardyń jumysyn udaıy jetildirip otyrǵan jón. Kıber-qylmystardyń aldyn alýǵa múmkindik beretin barynsha ıntellektýaldy júıe qurý kerek. Qajet bolsa, tıisti zańǵa jáne quqyq qorǵaý organdarynyń qyzmetine ózgerister engizgen jón, — dedi Memleket basshysy. 

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.