Tsıfrlyq aktıvterden túsken tabysqa salyq salyna ma
ASTANA. KAZINFORM – Qazaqstanda tsıfrlyq aktıvterden tabys tapqan azamattar úsh jyl boıy jeke tabys salyǵyn tólemeıdi. Bul týraly Qazaqstanda tsıfrlyq aktıvter ındýstrııasyn yntalandyrý jáne damytý sharalaryna arnalǵan baspasóz brıfınginde aıtyldy.
Jasandy ıntellekt jáne tsıfrlyq damý mınıstri Jaslan Madıevtiń aıtýynsha, jeńildik 2026 jylǵy 1 qańtardan 2028 jylǵy 31 jeltoqsanǵa deıin qoldanylady.
— Mundaı jeńildik tek tsıfrlyq aktıvtermen jasalǵan operatsııalar qazaqstandyq provaıderler arqyly júrgizilgen jaǵdaıda ǵana beriledi. Bul azamattardy sheteldik platformalardan qazaqstandyq provaıderlerge kóshýge yntalandyrý úshin engizilip otyr, - dedi mınıstr.
Sonymen qatar 1 qyrkúıekke deıin tsıfrlyq aktıvterdi sheteldik platformalardan qazaqstandyq provaıderlerge kóshirýdi yntalandyratyn qosymsha salyqtyq sharalar ázirlenip jatyr.
– Bul bıýdjet shyǵyny emes. Kerisinshe, zańdy naryqty keńeıtýge salynǵan ınvestıtsııa. Krıptoındýstrııadan túsetin salyq túsimderi 2023 jylǵy 9 mlrd teńgeden 2025 jyly 15 mlrd teńgeden asty, – dedi Jaslan Madıev.
Aıta keteıik, Qazaqstanda tsıfrlyq aktıvterdi erikti túrde jarııa etý tetigi engiziledi.
