Tsıfrlyq aktıvterdi retteý jańa kodekste qarastyrylady
ASTANA. KAZINFORM — Quryltaıda tsıfrlyq ekonomıkany eskere otyryp jańa Azamattyq kodeksti ázirleý jónindegi Prezıdenttiń bastamasy talqylandy.
Quryltaıdyń Konstıtýtsııalyq zańnama, sot júıesi jáne quqyq qorǵaý organdary komıtetinde «Qazaqstan Respýblıkasy Prezıdentiniń 2026 jylǵy 28 qazandaǵy Qazaqstan halqyna Joldaýy: tsıfrlyq ekonomıka turǵysynan azamattyq zańnamany jetildirý jáne qaıta qaraý máseleleri» taqyrybynda dóńgelek ústel ótti. «Ádilet» partııasy men Maqsut Narikbayev University birlesip uıymdastyrǵan alqaly jıynǵa Quryltaı tóraǵasynyń orynbasary Nurlan Beknazarov qatysty.
Otyrysta komıtet tóraǵasy Únzıla Shapaq bul is-shara Memleket basshysynyń Joldaýynda aıtylǵan jańa Azamattyq kodeksti qabyldaý qajettigi týraly bastamasyn iske asyrýǵa baǵyttalǵanyn atap ótti. Ol qoldanystaǵy Azamattyq kodekske qabyldanǵan sátten beri 150-den astam ózgeris pen tolyqtyrý engizilgenin aıtty. Qujatta zamanaýı sharttyq ınstıtýttardyń joqtyǵy Qazaqstannyń sheteldik áriptester úshin ınvestıtsııalyq tartymdylyǵyn tómendetedi. Al tsıfrlyq aktıvter men smart-kelisimsharttardy retteıtin normalardyń bolmaýy IT-sektor men ınnovatsııalyq ekonomıkanyń damýyn tejeıdi.
– Jańa Azamattyq kodeksti qabyldaý – eldiń quqyqtyq egemendigin nyǵaıtý, Qazaqstan Respýblıkasynyń turaqty ekonomıkalyq ósýin jáne quqyqtyq jańǵyrtylýyn qamtamasyz etý jónindegi strategııalyq qadam. Prezıdent Quryltaı depýtattarynyń aldyna Úkimetpen birlesip qujatty ázirleýge kirisý jáne ony kelesi jyldyń sońyna deıin qabyldaý týraly naqty mindet qoıdy. Bul jumys zańnama boıynsha sarapshylar qaýymdastyǵymen birge barlyq taraptyń birlesip áreket etýin talap etedi, – dedi Únzıla Shapaq.
Vıtse-spıker Nurlan Beknazarov óz sózinde dóńgelek ústel Quryltaı tóraǵasy Aıbek Dádebaıdyń tapsyrmasy boıynsha uıymdastyrylǵanyn atap ótti. Ol 1995 jyly qoldanysqa engizilgen Azamattyq kodeks Qazaqstannyń azamattyq zańnamasynyń berik negizine aınalǵanyn eske saldy. Alaıda ýaqyt talabyna oraı, ony jetildirý qajettiligi áldeqashan jetken bolatyn
– Memleket basshysy óz Joldaýynda bolashaqtyń ekonomıkasyna baıyppen kóshýdiń quqyqtyq negizine aınalatyn jańa Azamattyq kodeks qabyldaý qajettigin atap ótti. Elektrondyq mámileler, tsıfrlyq aktıvter, platformalyq ekonomıka, jasandy ıntellekt tehnologııalary jáne derekter aınalymy dástúrli azamattyq quqyq ınstıtýttaryna jańa talaptar qoıyp otyr. Bul rette jańa quqyqtyq retteý ekonomıkanyń damýyna kedergi keltirmeýge, kerisinshe, ınnovatsııalar men kásipkerlik bastamalar úshin qolaıly jaǵdaı jasaýǵa, azamattyq aınalymnyń quqyqtyq senimdiligi men turaqtylyǵyn qamtamasyz etýge tıis, – dedi Nurlan Beknazarov.
Vıtse-spıkerdiń aıtýynsha, dóńgelek ústel memlekettik organdardyń, ǵylymı jáne saraptamalyq qoǵamdastyqtyń pikirlerin toǵystyratyn mańyzdy kásibı alań bolyp otyr.
«Ádilet» partııasy tóraǵasynyń orynbasary Nursultan Baıtilesov jańa Azamattyq kodeks pen qoldanystaǵy zańdardyń kelisilýin qamtamasyz etý qajettigine toqtaldy. Onyń pikirinshe, ázirleýshiler normalardyń ekiushty bolmaýy úshin zańdy tulǵalar, korporatıvtik qatynastar, muragerlik jáne zııatkerlik menshik máselelerin retteýdiń biryńǵaı termınologııasy men quqyqtyq tásilderin qalyptastyrýy qajet.
– Bul rette «Zań jáne Tártip» qaǵıdatyn da eskerý kerek. Tsıfrlyq ekonomıkanyń damýy zańdylyqty nyǵaıtýmen, azamattardyń quqyqtaryn qorǵaýmen jáne tsıfrlyq ortadaǵy zań buzý úshin jaýapkershilikti qamtamasyz etýmen qatar júrýge tıis. Biz jańa tehnologııalardyń uıymdar, tsıfrlyq platformalar nemese avtomattandyrylǵan júıeler aldynda zańdy túrde osal bolyp qalýyna jol bermeýimiz kerek, – dedi Nursultan Baıtilesov.
Sondaı-aq, Maqsut Narikbayev University basqarma tóraǵasy Talǵat Nárikbaev, Ádilet vıtse-mınıstri Botagóz Jaqselekova, «Ádilet» partııasynyń «Ádiletti Orta» úılestirý-taldaý ortalyǵynyń jetekshisi Abzal Quspan baıandama jasady.
Dóńgelek ústel barysynda depýtattardyń, shaqyrylǵan zańgerler men sarapshylardyń qatysýymen taqyryptyq pikirtalas ótti.
Komıtet tóraǵasy Únzıla Shapaq jıyndy qorytyndylaı kele, barlyq qatysýshylarǵa mazmundy baıandamalary men jan-jaqty syndarly talqylaýy úshin alǵysyn bildirdi. Ol aıtylǵan barlyq eskertýler men usynystar Azamattyq kodeks jobasyn ázirleý kezinde eskeriletinin atap ótti.
Aıta ketelik Únzıla Shapaq jańa Azamattyq kodeksti qabyldaý ýaqyt talaby ekenin aıtqan edi.
