Tsıfrlyq aktıvterdi aıyrbastaýǵa taǵy 5 kompanııa úmitti
ASTANA. KAZINFORM – Qamtamasyz etilmegen tsıfrlyq aktıvterdi aıyrbastaýǵa úmitti taǵy 5 kompanııa lıtsenzııalaý rásiminen ótip jatyr. Bul týraly Úkimet otyrysynda Ulttyq bank tóraǵasy Tımýr Súleımenov aıtty.
Onyń aıtýynsha, tsıfrlyq aktıvter naryǵynyń ınfraqurylymy baǵytynda Ulttyq bank Qazaqstan qor bırjasyna tsıfrlyq qarjy aktıvteri platformasynyń jáne tsıfrlyq aktıvter saýda platformasynyń operatory mártebesin berdi. Búginge deıin KASE (qor bırjasy) tsıfrlyq platformasynda bıtkoın fıýchersine arnalǵan ETF boıynsha 20,5 mlrd teńgege 34 myń operatsııa jasaldy. Úsh krıptoaktıvke arnalǵan jańa ETF boıynsha 1 mlrd teńgege 650 operatsııa júzege asty.
- Qamtamasyz etilmegen tsıfrlyq aktıvterdi aıyrbastaıtyn lıtsenzııalanǵan úsh operator jumys isteı bastady. Alǵashqy eki aıda olardyń aınalymy shamamen 2 mlrd teńgeni qurady. Taǵy bes kompanııa lıtsenzııalaý rásiminen ótip jatyr. Óz kezeginde, Ortalyq depozıtarıı ustaýshylardyń biryńǵaı tizilimin júrgizedi jáne ulttyq kastodıandyq ınfraqurylymdy qalyptastyrady. Krıptofıattyq servıster keńeıip keledi. Operatsııalarǵa qyzmet kórsetýge banktik emes tólem provaıderleri qosylyp jatyr. Krıptokarta, krıpto-QR jáne krıptoekvaırıng jumys istep tur. Osylaısha, qysqa merzimde aýqymdy jumys atqarylyp, naryqtyń tolyqqandy ınfraqurylymy qalyptasty, - dedi Tımýr Súleımenov.
Onyń atap ótýinshe, sektordy damytý jónindegi kelesi mańyzdy ári aýqymdy qadam Prezıdenttiń 7 shildedegi Jarlyǵy boldy. Jarlyq mynadaı negizgi mindetterdi aıqyndady:
- tsıfrlyq aktıvterdiń tolyqqandy ındýstrııasyn qalyptastyrý;
- tsıfrlyq aktıvtermen operatsııalardy eldiń retteletin ekojúıesine kóshirýdi yntalandyrý;
- ekonomıkany tokendeýdi iske qosý jáne ekonomıkanyń naqty sektoryn qarjylandyrý kózderin ártaraptandyrý;
- esep aıyrysýdyń jańa quraldaryn engizý;
- ınvestorlardyń quqyǵyn qorǵaý jáne zańsyz aınalym men kapıtaldy áketýge qarsy is-qımyl jasaý.
Aıta keteıik, Úkimet otyrysynda tsıfrlyq aktıvter salasyn damytý máselelerin talqylanyp jatyr.
