Tsıfrlyq aktıvter jáne tólem júıeleri komıteti qurylady – Úkimet
ASTANA. KAZINFORM — Búgin Úkimet otyrysynda Premer-mınıstr Oljas Bektenov tsıfrlyq aktıvter máselesi boıynsha mınıstrlikterge tapsyrma berdi.
- Ulttyq ekonomıka mınıstrligi múddeli memlekettik organdarmen birlesip, tsıfrlyq aktıvter naryǵynda básekege qabiletti jaǵdaılar qalyptastyrýy qajet. Usynylyp otyrǵan sheshimder Qazaqstan ekonomıkasyna kapıtaldy qaıtarýǵa, ishki naryqty damytýǵa jáne halyqaralyq qatysýshylardy belsendi tartýǵa yqpal etýge tıis. Sonymen qatar Tsıfrlyq aktıvter jáne tólem júıeleri komıtetin qurý jumystaryn jedeldetý qajet, - dedi O. Bektenov.
Onyń aıtýynsha, tsıfrlyq aktıvter ındýstrııasyn damytý – bul tek qarjylyq retteý máselesi ǵana emes. Atalǵan baǵyttyń negizinde zamanaýı tehnologııalar, baǵdarlamalyq sheshimder jáne joǵary bilikti mamandar tur. Naryqtyń damýy el ishinde qajetti quzyretterdiń qalyptasýyna yqpal etýge tıis.
- Jasandy ıntellekt mınıstrligine Ǵylym mınıstrligimen jáne basqa da múddeli memlekettik organdarmen birlesip, quzyretterdi damytýǵa jáne qazaqstandyq tehnologııalyq kompanııalardyń paıda bolýyna qajetti jaǵdaılar jasaýdy tapsyramyn. Qazaqstan tsıfrlyq aktıvter aınalymynyń alańy ǵana emes, sonymen qatar osy sala úshin óz ónimderin ázirlep, joǵary bilikti mamandaryn daıarlaıtyn el bolýy kerek, - dedi Úkimet basshysy.
Onyń sózine qaraǵanda, tsıfrlyq qarjy quraldaryn damytý halyqaralyq esep aıyrysý júıesin jetildirý baǵytynda jańa múmkindikter ashady. Qazaqstan úshin mundaı sheshimderdiń áleýetin der kezinde baǵalap, osy baǵytta óz quzyretterin qalyptastyrý mańyzdy. Ulttyq bank múddeli taraptarmen birlesip, osyndaı quraldardy halyqaralyq esep aıyrysýlarda qoldaný múmkindigin pysyqtaýy qajet. Atalǵan tetikter esep aıyrysý jyldamdyǵyn arttyryp, qazaqstandyq bıznestiń múmkindikterin keńeıtýge yqpal ete alatyn bolashaǵy zor baǵyttardy aıqyndaýǵa tıis.
- Ulttyq bank Tsıfrlyq aktıvter naryǵyn damytý jónindegi birlesken is-qımyl josparyn ázirledi. Osy qujattyń qabyldanýy tsıfrlyq aktıvterdi ekonomıkada qoldaný aıasyn keńeıtip, ınvestıtsııalyq tartymdylyqty arttyrýǵa jáne zamanaýı ári básekege qabiletti tsıfrlyq aktıvter salasyn qalyptastyrýǵa múmkindik beredi. Atalǵan jospardy maquldaýdy usynamyn. Ulttyq bank memlekettik organdarmen birlesip, Memleket basshysynyń tsıfrlyq aktıvter ındýstrııasyn yntalandyrý jáne damytý jónindegi Jarlyǵynda belgilengen sharalardyń ýaqtyly ári sapaly júzege asyrylýyn qamtamasyz etýge tıis. Naqty nátıjelerge qol jetkizý úshin árbir basshynyń derbes jaýapkershiligi kózdelgen. Osyǵan basa nazar aýdaramyn, - dedi Premer-mınıstr.
Budan buryn habarlanǵandaı, elimizde 76 lıtsenzııalanǵan maıner bar.
