Tsıfrlyq aktıvter jáne tólem júıeleri komıteti qurylady
ASTANA. KAZINFORM — Búgin Úkimet otyrysynda Ulttyq bank tóraǵasy Tımýr Súleımenov tsıfrlyq aktıvter naryǵyn damytý úshin júzege asyrylýǵa tıis naqty sharalardy atady.
— Birinshi — lıtsenzııalanǵan provaıderlerdiń fýnktsııasyn keńeıtý. Naryqta tolyq tsıkldi kompanııalar paıda bolýǵa tıis. Olar tsıfrlyq aktıvterdi shyǵarady, satady, aıyrbastaıdy jáne saqtaıdy. Sondaı-aq esep aıyrysýdy júrgizedi. Operatsııalarǵa bankter, brokerler jáne basqa qarjy uıymdary keńinen tartylady. Ekinshi — Qazaqstanda shyǵarylǵan steıblkoınderdi paıdalaný. Olar taýarlar men qyzmetterge aqy tóleýde, eksporttyq-ımporttyq operatsııalarda jáne transshekaralyq aýdarymdarda qoldanylady. Bul esep aıyrysýdy jedeldetip, bıznes shyǵyndaryn azaıtady. Úshinshi -ortalyqtandyrylmaǵan qarjyny retteý tásilderin ázirleý. DeFi bıznes-modelderine taldaý júrgizilip, onyń úzdik artyqshylyqtary — jyldamdyq pen smart-mehanızmderdi jańa baǵdarlamalanatyn servısterdi engizý kózdeledi, — dedi UB tóraǵasy.
Ol tórtinshi shara retinde tsıfrlyq maınıngti damytýdy atady. Bul rette maınıng úshin jalpy energııa júıesine qosymsha júkteme túsirmeıtin paıdalanylmaıtyn, avtonomdy jáne jańartylǵan energııa kózderin paıdalaný usynylady.
— Besinshi — arnaıy salyq rejımin qurý, onyń ishinde 2026-2028 jyldary qazaqstandyq provaıderler arqyly jasalǵan operatsııalar boıynsha jeke tulǵalardyń kirisin jeke tabys salyǵynan bosatý. Altynshy — Ulttyq banktiń janynan Tsıfrlyq aktıvter jáne tólem júıeleri komıtetin qurý. Ol saıasatty ázirleýdi, lıtsenzııalaýdy, qadaǵalaýdy, taldaýdy jáne ınnovatsııalyq jobalardy súıemeldeýdi biriktiredi, — dedi Tımýr Súleımenov.
Aıta keteıik, Úkimet otyrysynda tsıfrlyq aktıvter salasyn damytý máseleleri talqylanyp jatyr.
