Tsıfrlyq aktıvter salasynyń damýyna qajet negizgi jaǵdaılar jasaldy – Premer-mınıstr
ASTANA. KAZINFORM — Búgin Úkimet otyrysynda Premer-mınıstr Oljas Bektenov otandyq qarjy sektorynyń básekege qabilettiligin arttyrýǵa qatysty pikir aıtty.
- Memleket basshysy elimizdiń tehnologııalyq jańǵyrýyna qatysty mańyzdy mindetter qoıdy. Tsıfrlyq aktıvter salasy - Qazaqstan ekonomıkasynda múldem jańa baǵyt. Onyń damýyna qajetti negizgi jaǵdaılardyń bári jasaldy. Endi tolyqqandy ekojúıeni qalyptastyrý kezeńi júrip jatyr. Bul ınvestıtsııalar men jańa tehnologııalardy tartyp, otandyq qarjy sektorynyń básekege qabilettiligin arttyrý úshin mańyzdy. Endigi kezekte tsıfrlyq aktıvter men jańa qarjy quraldaryn birtutas qarjy jáne tehnologııa jelisine yqpaldastyrý qajet, - dedi O. Bektenov.
Onyń sózine qaraǵanda, naqty aktıvterdi tokenızatsııa jasaýǵa basa kóńil bólý kerek. Bul ekonomıkaǵa qarajat tartýdyń taǵy bir tıimdi quralyna aınalady.
- Bizde iri ınfraqurylymdyq jobalar, jyljymaıtyn múlik nysandary, shıkizattyq jáne basqa da aktıvter bar. Osy jobalarǵa qosymsha qarajat tartý úshin tokenızatsııany paıdalanýǵa bolady, ıaǵnı, salynyp jatqan kez kelgen ǵımaratty nemese jobany ınvestorlar qarjylandyra alatyn tsıfrlyq úlesterge bólýge bolady. Mundaı jobaǵa kez kelgen adam aktsıoner retinde qatysa alady. Ulttyq bank aktıvterdiń naqty tizbesin aıqyndaýy qajet. Olar ınvestıtsııa tartý úshin basym tártippen tsıfrlyq nysanǵa aýystyrylýǵa tıis. Bul tetik muqııat rettelip, júrgiziletin mámilelerdiń qaýipsizdigine kepildik berilýi kerek, - dedi Úkimet basshysy.
Budan buryn habarlanǵandaı, elimizde 76 lıtsenzııalanǵan maıner bar.
