Tsıfrlyq aktıvter ındýstrııasynan el bıýdjetine qansha qarajat tústi
ASTANA. KAZINFORM — Jasandy ıntellekt jáne tsıfrlyq damý mınıstrligi Tsıfrlyq aktıvter jáne serpindi tehnologııalar komıteti tóraǵasynyń orynbasary Mıras Zákıev ekonomıkadaǵy maınıngke qatysty túsinik berdi.
— Barlyq maıner akkredıttelgen qazaqstandyq maınıng-pýldar arqyly jumys isteýge mindetti. Sonymen qatar, salyqty ákimshilendirý tetikteri aıqyndaldy: maınerler men maınıng-pýldar úshin korporatıvtik tabys salyǵy, jeke tulǵalar úshin onyń qunynyń ósimine salyq salý, al krıptobırjalarǵa korporatıvtik tabys salyǵy. Buǵan qosa, tsıfrlyq maınerler bıýdjetke tsıfrlyq maınıng úshin tólem aýdarady, — dedi Mıras Zákıev Senatta «Qazaqstanda tsıfrlyq aktıvter ındýstrııasyn damytý» taqyrybyn talqylaý kezinde.
Sonymen qatar ol tsıfrlyq aktıvter ındýstrııasynyń tabysyna qatysty kórsetkishterdi jarııalady.
— Qarjy mınıstrligi Memlekettik kirister komıtetiniń málimetine qaraǵanda, tsıfrlyq aktıvter ındýstrııasynan 2023 jyly bıýdjetke shamamen 9 mlrd teńge, 2024 jyly 10,4 mlrd teńge, sondaı-aq 2025 jyldyń birinshi jartyjyldyǵynda 7,7 mlrd teńge tústi. Osy oraıda usynylǵan derekterge súıensek, tsıfrlyq maınıng ındýstrııasynan bıýdjet kirisiniń ósý qarqyny baıqalyp otyr, — dedi ol.
Aıta keteıik, 2026 jyldan bastap zańnamaǵa ózgerister engizilgennen keıin, maınıng pen krıpto-bırjadan keletin túsim kólemi artatynyn jazǵan edik.
Budan buryn habarlanǵandaı, bıyl 26 qarashada Parlament Májilisi «Qazaqstan Respýblıkasyndaǵy bankter jáne bank qyzmeti týraly» zańy men ilespe qujatty qabyldandy.
Memlekettik tsıfrlyq aktıvterdi basqarý tıimdiligin arttyrý maqsatynda Ulttyq strategııalyq krıptorezerv qurý kózdelgen. Bul tetik memleketke tsıfrlyq aktıvterdi qaýipsiz esepteý jáne saqtaýǵa, sonymen qatar memlekettik resýrs kiristiligin arttyrady.