Tsıfrly áleýmettik qoldaý: Qazaqstanda 6,2 mln otbasy jańa júıemen qamtyldy
ASTANA. KAZINFORM – Qazaqstanda azamattardy áleýmettik qoldaý júıesi keńeıtilip, zeınetaqy men járdemaqylardyń mólsheri ulǵaıtyldy, jumyspen qamtý baǵdarlamalary kúsheıtildi jáne áleýmettik qyzmetterdi tsıfrlandyrý jalǵasyp jatyr, dep habarlaıdy Úkimet.
Bıylǵy 1 qańtardan bastap ortaq zeınetaqy men barlyq zeınetaqy tólemderi 10%-ǵa ındeksteldi. Osy maqsatqa respýblıkalyq bıýdjetten shamamen 4,9 trln teńge bólinip, 2,6 mln-ǵa jýyq zeınetker qamtyldy.
– Indeksteý nátıjesinde jıyntyq zeınetaqynyń eń tómengi mólsheri 105 myń teńgege, eń joǵarysy 238 myń teńgege jetti. Ortasha zeınetaqy kólemi 198 myń teńgeni qurady. Biryńǵaı jınaqtaýshy zeınetaqy qoryndaǵy jınaq kólemi 25,7 trln teńgege jetip, jumyspen qamtylǵan halyqtyń shamamen 69%-yn qamtydy, – delingen Úkimet málimetinde.
Balaly otbasylarǵa tólenetin barlyq memlekettik áleýmettik járdemaqylar da 10%-ǵa kóbeıtildi. Bul maqsatqa 974 mlrd teńge bólinip, 1 maýsymdaǵy jaǵdaı boıynsha memlekettik qoldaý sharalarymen shamamen 1,3 mln adam qamtylǵan.
Sonyń ishinde 149,8 myń azamatqa bala týýyna baılanysty 29,6 mlrd teńge kóleminde birjolǵy járdemaqy tólense, 131,2 myń jumys istemeıtin ata-anaǵa bala kútimi boıynsha 21 mlrd teńge bólingen. Sondaı-aq 636 myń kópbalaly otbasyǵa 303,3 mlrd teńge kóleminde memlekettik qoldaý kórsetilgen.
– Memlekettik áleýmettik saqtandyrý qory arqyly 896,3 myń adamǵa jalpy somasy 332,7 mlrd teńge kóleminde áleýmettik tólem tólendi. Onyń ishinde eńbekke qabilettiliginen aıyrylǵan azamattarǵa, asyraýshysynan aıyrylǵan otbasylarǵa, jumyssyz qalǵan azamattarǵa jáne júktilik pen bala kútimine baılanysty tólemder qarastyrylǵan, – dep atap ótti Úkimet.
Bıyl 36,4 myń otbasynyń quramyndaǵy 196,4 myń adamǵa jalpy somasy 17 mlrd teńge kóleminde ataýly áleýmettik kómek taǵaıyndaldy. Sonymen qatar mektepke deıingi jastaǵy 61 myń balaǵa qosymsha aı saıynǵy tólem belgilendi.
Múgedektigi bar 545 myń azamattyń járdemaqysy 10%-ǵa ósip, ortasha mólsheri 87 myń teńgege jetti. Inklıýzıvti ınfraqurylymdy damytý aıasynda erekshe qajettiligi bar azamattarǵa beıimdelgen nysandar sany 30 myńǵa jýyqtady. Sonymen birge 12 óńirde jańa ońaltý ortalyqtary salynyp, 10 qalada aýtızmi bar balalarǵa arnalǵan kúndizgi ortalyqtar ashyldy.
Jumyspen qamtý baǵytynda da oń nátıjeler baıqalady. Shilde aıyndaǵy jaǵdaı boıynsha 249,6 myń adam jumysqa ornalastyrylǵan. Onyń ishinde 69,9 myńy turaqty jumysqa qabyldansa, 69,8 myńy jumyspen qamtýdyń belsendi sharalaryna tartylǵan.
– Jalpy quny 103,4 trln teńgeni quraıtyn 3,3 myń ınvestıtsııalyq joba aıasynda qurylatyn 426,6 myń jańa jumys orny «Innovatsııalyq jobalar navıgatory» platformasy arqyly baqylanady. Sonymen qatar 182,3 myń adam kásiptik baǵdar berý, onlaın oqytý jáne «Bastaý Bıznes» baǵdarlamalarymen qamtyldy, – delingen habarlamada.
Áleýmettik qoldaý júıesin tsıfrlandyrý aıasynda Smart Data Ukimet platformasy 6,2 mln otbasy týraly málimetti biriktirip otyr. Óńirlerde 158 Otbasyn qoldaý ortalyǵy jumys isteıdi. Family Service Management júıesi arqyly 30 myńnan astam ótinish qaralyp, 25 myń otbasy quqyqtyq jáne psıhologııalyq kómek aldy, al 5 myń otbasy turaqty patronajǵa alynǵan.
Aıta keteıik, Astanada zeınetaqy men járdemaqyny rásimdeý jeńildedi.
