Tsıfrlandyrýǵa baılanysty HQKO qyzmetkerleri qysqartylmaıdy – vıtse-mınıstr
ASTANA. KAZINFORM – Memlekettik qyzmetterdi tsıfrlandyrýǵa baılanysty Halyqqa qyzmet kórsetý ortalyqtarynyń (HQKO) qyzmetkerlerin jappaı qysqartý josparlanyp otyrǵan joq. Bul týraly Úkimettegi brıfıngte Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın aıtty.
Onyń aıtýynsha, halyq aǵynynyń azaıýyna baılanysty qyzmetkerlerdi basqa baǵyttarǵa qaıta bólý qarastyrylady.
– Bizde qyzmetkerlerdi jumystan bosatý maqsaty joq. Halyq aǵyny azaıǵan jaǵdaıda belgili bir kólemdegi azamattarǵa qyzmet kórsetý úshin qansha qyzmetker qajet ekenin anyqtaıtyn ádisteme bar. Osy ádisteme boıynsha turaqty túrde taldaý júrgizemiz, – dedi spıker.
Onyń aıtýynsha, buǵan deıin shtat sanyn ońtaılandyrý bos jumys oryndaryn qysqartý jáne jańa qyzmetkerler qabyldaýǵa moratorıı engizý arqyly júrgizilgen. Qoldanystaǵy qyzmetkerlerdi qysqartpaýǵa basymdyq berilip otyr.
Sonymen qatar HQKO qyzmetkerleriniń bir bóligi azamattarǵa konsýltatsııa berýge, bıznes-protsesterdi taldaýǵa jáne memlekettik qyzmetterdi qaıta qurýǵa baǵyttalady.
Spıkerdiń aıtýynsha, memlekettik qyzmetterdi tsıfrlandyrý aıasynda HQKO-lardyń jumys formaty da ózgeredi.
Jańa formattaǵy tsıfrlyq halyqqa qyzmet kórsetý keńselerinde ózine-ózi qyzmet kórsetý aımaqtary basym bolady. Munda qujattandyrýǵa arnalǵan termınaldar jáne eGov GPT júıesi ornalastyrylady.
– Qazirgi HQKO-larda qyzmetkerlerdiń basym bóligi azamattardyń ornyna kompıýter arqyly qyzmetterdi rásimdeıdi. Jańa formatta negizinen ózine-ózi qyzmet kórsetý sektorlary bolady. Al onlaın formatta ázirge kórsetý múmkin emes memlekettik qyzmetter úshin eki-úsh operator jumys isteıdi, – dedi spıker.
Onyń aıtýynsha, HQKO qyzmetkerleriniń bir bóligi jańa mindetterge qaıta daıarlanady.
– HQKO qyzmetkerleri memlekettik qyzmet kórsetý rásimderi boıynsha eń quzyretti mamandardyń biri. Sondyqtan olardyń bir bóligi bıznes-protsesterdi, memlekettik qyzmetterdi, sondaı-aq memleket pen azamattar jáne bıznes arasyndaǵy ózara is-qımyldy qaıta qurý baǵyttaryna qaıta daıarlanady, – dedi spıker.
Aıta keteıik, bıylǵy jarty jylda jumyssyzdyq qansha paıyz bolǵanyn jazǵanbyz.
