Tsıfrlandyrýdyń jańa kezeńi: Qazaqmys JI men bultty servısterdi engizý jobasyn iske qosady
ASTANA. KAZINFORM – Qazaqmys óndiristik úderisterdi jańa deńgeıge kóterý úshin Freedom Cloud kompanııasymen birge bultty júıege kezeń-kezeńimen kóshýdi bastady. Joba jasandy ıntellektti engizýge, derekter qaýipsizdigin kúsheıtýge jáne tsıfrlyq servısterdiń qoljetimdiligin keńeıtýge baǵyttalǵan.
«Qazaqmys» korporatsııasy men qazaqstandyq Freedom Cloud IT-kompanııasy tsıfrlyq tehnologııalar salasynda yntymaqtastyq týraly memorandýmǵa qol qoıdy. Birlesken jumys kásiporynnyń IT-ınfraqurylymyn jańǵyrtýǵa, óndiristik úderisterge bulttyq sheshimder men jasandy ıntellekt elementterin engizýge baǵyttalyp otyr.
Bultty júıege kóshý kompanııanyń barlyq eseptik jáne jelilik resýrstaryn birtutas tsıfrlyq ortada biriktirýge múmkindik beredi. Bul derekter qaýipsizdigin arttyryp, negizgi óndiristik júıelerdiń úzdiksiz jumysyn qamtamasyz etýge jol ashady.
«Búgingi tańda naryq pen tehnologııalar senimdilik, kıberqaýipsizdik jáne negizgi úderisterge tolyq baqylaýdy saqtaı otyryp beıindi emes qyzmetterdi kásibı oıynshylarǵa birtindep tapsyrýǵa múmkindik beretin deńgeıge jetti. Biz bul qadamǵa bir rettik joba retinde emes, ózara senimge negizdelgen uzaq merzimdi seriktestik retinde qaraımyz. Bul bizdiń júıelerdiń turaqtylyǵy men tıimdiligin arttyrýǵa, sondaı-aq tsıfrlyq qyzmetti damytýda jańa múmkindik ashýǵa yqpal etedi. Bul qadam eki kompanııa úshin de oı eleginen ótkizilgen salmaqty sheshim jáne alǵa qaryshtap damýdyń bastamasy boldy», – dedi «Qazaqmys korporatsııasy» JShS Basqarma tóraǵasy Nurahmet Nýrıev.
2026 jylǵy qańtar men maýsym aralyǵynda «Qazaqmys» bulttyq ınfraqurylymnyń jáne jańa tsıfrlyq servısterdiń jumysyn synaqtan ótkizetin ilki jobany júzege asyrady. Іlki kezeń kelesi múmkindikterdi beredi:
• derekterdi óńdeý jyldamdyǵyn arttyrý jáne korporatıvtik júıelerdiń turaqtylyǵyn kúsheıtý;
• jabdyqty baqylaýǵa arnalǵan jasandy ıntellekt pen boljaý analıtıkasyn engizý, bul toqtap qalýdy aldyn ala eskertýge múmkindik beredi;
• keńseden bastap kenishke deıin jeliniń kez kelgen núktesinen tsıfrlyq qyzmetterge qoljetimdilikti qamtamasyz etý;
• avtomattandyrý arqyly qyzmetkerlerdiń jumysyn jeńildetip, qolmen oryndalatyn operatsııalardy azaıtý.
Freedom Cloud Tier III deńgeıindegi ınfraqurylymdy rezervtik kóshirýmen, kıberqorǵaýmen jáne táýlik boıy monıtorıngpen qamtamasyz etedi. Osy platformada jasandy ıntellekt arqyly protsesterdi basqarý tehnologııalary synaqtan ótkizilip, DevOps júıesi jańa tsıfrlyq quraldardy jedel engizýge jol ashady.
Freedom Cloud kompanııasynyń bas dırektory Temirlan Zınalabdın bul jobanyń el ekonomıkasy úshin mańyzyn atap ótti.
«Eldegi iri ónerkásiptik kompanııalardyń bultty tehnologııalar men jasandy ıntellektke bet bura bastaýy tsıfrly ekonomıkanyń jańa kezeńine qadam basqanynyń belgisi. Biz «Qazaqmysqa» tıimdilikti arttyryp qana qoımaı, jasandy ıntellekt pen bultty sheshimderdi qoldanýda tutas taý-ken metallýrgııa salasyna úlgi bolatyndaı ınfraqurylym quryp jatyrmyz», - dedi ol.
Aldaǵy ýaqytta taraptar ónerkásiptik alańdarda málimetti óńdeýdiń modýldik ortalyqtaryn qurýdy, sondaı-aq basqarylatyn bulttyq qyzmetterdi engizýdi josparlap otyr. Bul sheshimder óndiristiń tıimdiligin arttyryp, kompanııa ishindegi tsıfrlyq qyzmet sapasyn jaqsartýǵa múmkindik beredi.
Osyǵan deıin «Qazaqmys» pen ISKRATEL arasyndaǵy kelisim óndiristik alańdardyń tereń tsıfrlyq jańǵyrtylýyna jol ashatynyn? Jáne de 5G, baılanys jáne ónerkásiptik ınternet tehnologııalary qyzmettik úderisterdi ǵana emes, qyzmetkerlerdiń eńbek jaǵdaıyn da ózgertetini jaıly jazǵan bolatynbyz.