Tsıfrlandyrýdyń arqasynda Otbasy bank turǵyn úıdi bólýdi úsh ese jedeldetti
ASTANA. KAZINFORM – «Báıterek» holdınginiń enshiles uıymy — Otbasy bank tsıfrlyq modelge kóshkennen keıin turǵyn úıdi bólý protsesin úsh ese jedeldetti.
Búginde bul jumysty banktiń 20 mamany atqarady. Al buǵan deıin ákimdikterde turǵyn úıdi bólý protsesine jalpy sany shamamen 700 qyzmetker tartylǵan.
Azamattardy turǵyn úımen qamtamasyz etý júıesiniń tsıfrlyq transformatsııasynyń nátıjeleri týraly Otbasy bank Basqarma tóraıymy Lázzat Ibragımova Úkimet otyrysynda aıtyp berdi.
Qazirgi tańda Qazaqstandaǵy ıpotekalyq portfeldiń 55%-y Otbasy banktiń úlesinde. Eldegi turǵyn úı satyp alýǵa beriletin árbir ekinshi qaryz osy bankte rásimdeledi. Banktiń klıentteriniń sany 4 mln qazaqstandyq. Kún saıyn 300-den astam otbasy ıpoteka alyp otyr.
Bank ulttyq damý ınstıtýty mártebesin alǵannan keıin onyń aldyna taǵy bir aýqymdy mindet — turǵyn úıge muqtaj azamattarmen jumys isteý mindeti qoıyldy.
Turǵyn úı adam aralasýynsyz bólinedi
Turǵyn úıdi bólý protsesin avtomattandyrý úshin Otbasy bank «Turǵyn úımen qamtamasyz etý ortalyǵy» tsıfrlyq platformasy men orken.otbasybank.kz portalyn iske qosty.
Júıe 15 memlekettik derekqormen ıntegratsııalanǵan. Ol azamattar týraly málimetterdi avtomatty túrde tekseredi, qaıtalanatyn derekterdi alyp tastaıdy jáne azamattardyń turǵyn úıdi bólý talaptaryna sáıkestigin anyqtaıdy.
Іs júzinde ár otbasy boıynsha tsıfrlyq karta qalyptastyrylady. Qajetti tekserýler qyzmetkerlerdiń qolmen aralasýynsyz jáne qaǵazbastylyqsyz júrgiziledi.
2026 jyldyń shildesinen bastap turǵyn úıge muqtaj retinde esepte turǵan azamattarǵa arnalǵan jeke kabınet Otbasy bank mobıldi qosymshasynda qoljetimdi boldy. Smartfon arqyly azamat óziniń mártebesin, sanatyn, esepke qoıylǵan kúnin jáne óńirin teksere alady. Sondaı-aq elektrondyq tsıfrlyq qoltańba (ETsQ) arqyly derbes derekterdi jınaýǵa jáne óńdeýge kelisim bere alady.
Jyl sońyna deıin mobıldi qosymshanyń múmkindikteri keńeıtiledi. Azamattar qosymsha arqyly turǵyn úıge muqtaj retinde esepke turyp, turǵyn úıdi bólýge qatysýǵa kelisim bere alady.
Bul ásirese shalǵaı eldi mekenderdiń turǵyndary úshin mańyzdy. Endi qyzmet alý úshin kompıýter qajet bolmaıdy jáne aýdandyq nemese oblystyq ortalyqqa barýdyń qajeti joq.
Otbasy banktiń ulttyq damý ınstıtýty retindegi qyzmeti bastalǵaly beri 30 569 qazaqstandyq otbasy jalǵa beriletin jáne kredıttik turǵyn úı aldy.
Salystyrmaly túrde: buǵan deıin ákimdikter jylyna shamamen 7 000 páter bóletin. Bul protseske shamamen 700 qyzmetker tartylǵan. Búginde Otbasy bankte bul jumysty 20 maman atqarady, al turǵyn úıdi bólý protsesi úsh ese jyldam júzege asyrylady.
Jalpy, 2021 jyldan beri turǵyn úıge muqtaj retinde esepte turǵan 143 400 qazaqstandyq óz baspanasyna ıe boldy. 2033 jylǵa deıin bank baǵdarlamalary arqyly taǵy 292 000 adamdy turǵyn úımen qamtamasyz etý josparlanyp otyr.
Bes kún 15 mınýtqa deıin qysqardy
Tsıfrlandyrý ıpotekany rásimdeý protsesin de ózgertti.
2021 jyldan beri Otbasy bank «Azamattarǵa arnalǵan úkimet» memlekettik korporatsııasymen birlesip Blockchain tehnologııasyn qoldanady.
Bul tehnologııa kepildi tirkeý, turǵyn úı satyp alý kezinde menshik quqyǵyn tirkeý, memlekettik baǵdarlama boıynsha turǵyn úıdi jaldaý shartyn tirkeý jáne kepildi alyp tastaý kezinde paıdalanylady.
Mysaly, buǵan deıin kepildi tirkeý bes jumys kúnine deıin ýaqyt alatyn. Klıent bankten qaǵaz túrindegi shartty alyp, HQO-ǵa baratyn, qujattaryn tapsyryp, rásimdelýin kútetin. Keıin qujattaryn qaıta alyp, bankke oralatyn.
Qazir bul protsestiń barlyǵy elektrondy formatta júzege asyrylady jáne nebári 10–15 mınýt ýaqyt alady.
Tehnologııa iske qosylǵannan beri 254 172 operatsııa júrgizildi. Búginde qaryzdardyń shamamen 60%-y Blockchain tehnologııasy arqyly rásimdeledi.
Banktiń baǵalaýynsha, bul protsesti tsıfrlandyrý qazaqstandyqtardyń 500 myńnan astam jumys saǵatyn únemdeýge múmkindik berdi.
Jasandy ıntellekt klıentke 3 — 4 sekýndta jaýap beredi
Tsıfrlyq transformatsııanyń taǵy bir baǵyty — jasandy ıntellekt.
Quanysh AI chat-boty klıentterge táýlik boıy qazaq jáne orys tilderinde keńes beredi. Búginde ol ótinishterdiń 96%-yn operatordyń qatysýynsyz óńdeıdi. Al jaýap berý ýaqyty orta eseppen nebári 3–4 sekýndty quraıdy. Jalpy, Quanysh AI osy ýaqytqa deıin shamamen 3,5 mln ótinishti óńdedi.
Jasandy ıntellekt banktiń ishki protsesterinde de qoldanylady. Buǵan deıin klıenttiń tólem qabiletin esepteý 10–15 mınýt ýaqyt alsa, qazir bul protsess 2 mınýttan az ýaqytta oryndalady.
«Dıplommen — aýylǵa!» baǵdarlamasy boıynsha ótinishti qaraý ýaqyty 5 mınýtqa deıin, kepildi monıtorıngteý 5 mınýtqa deıin qysqardy. Depozıtti basqa tulǵaǵa berý operatsııasyn rásimdeý ýaqyty 135 mınýttan 7 mınýtqa deıin azaıdy.
Qaryzdy qaıta qaraý boıynsha qorytyndy daıyndaý buryn istiń kúrdeliligine qaraı 30 mınýttan birneshe kúnge deıin ýaqyt alatyn. Qazir bul protsess nebári birneshe mınýtta oryndalady.
Búginde Otbasy banktiń barlyq operatsııalarynyń 95%-y onlaın formatta qoljetimdi. Al tsıfrlyq servısterdi 1,44 mln adam belsendi paıdalanady. Sońǵy úsh jylda olardyń sany 10 esege ósti.
