Tsıfrlandyrýdyń arqasynda kóleńkeli ekonomıkadan 28 mlrd teńgeden astam qarjy qaıtaryldy

ASTANA. KAZINFORM – Prezıdenttiń «Ádiletti Qazaqstan: zań men tártip, ekonomıkalyq ósim, qoǵamdyq optımızm» Joldaýyndaǵy tapsyrmalaryn júzege asyrý aıasynda elimizde memlekettik qyzmetterdi tsıfrlandyrý boıynsha aýqymdy jumys júrgizilýde.

2021 jyldan bastap júzege asyp kele jatqan tsıfrlyq transformatsııa memlekettik basqarýdyń tıimdiligin arttyrýǵa, ákimshilik jáne sybaılas jemqorlyq kedergilerdi azaıtýǵa, sondaı-aq azamattar men bızneske kórsetiletin qyzmetterdiń sapasyn jaqsartýǵa baǵyttalǵan.

Tsıfrlyq sheshimder kóleńkeli ekonomıkadan 28 mlrd teńgeden astam qarajatty shyǵarýǵa, 13 mlrd teńgeden astam bıýdjet qarajatyn únemdeýge múmkindik berdi. Jalpy tıimdilik 51,3 mlrd teńgege jetti. Memlekettik qyzmetterdi kórsetý merzimi 20 esege qysqardy. Sybaılas jemqorlyq táýekelderi aıtarlyqtaı tómendedi.

Salalardy tsıfrlyq transformatsııalaý aıasynda QazTech ulttyq platformasy iske qosyldy. Ol tsıfrlyq ónimderdi jedel ázirleýge arnalǵan jáne jańa ІT-sheshimderdi engizý merzimin burynǵy 1,5-3 jyldan 6 aıǵa deıin qysqartýǵa múmkindik beredi.

Qazirgi tańda QazTech bazasynda memlekettik organdardyń biryńǵaı ınternet-portaly, Smart Bridge júıesi jáne Ulttyq ekologııalyq derekter qory jumys istep tur.

«Qazaqstan tsıfrlandyrý boıynsha álemdegi 193 eldiń ishinde 24-orynda tur. Al onlaın qyzmetter ındeksi boıynsha top on eldiń qataryna kiredi. Qazir memlekettik qyzmetterdiń 92 paıyzyn onlaın alýǵa bolady», – dedi tsıfrlyq damý, ınnovatsııa jáne aeroǵarysh ónerkásibi mınıstri Jaslan Mádıev.

Aıta keteıik, buǵan deıin memlekettik organdardyń QazTech-ke kóshýi nege mańyzdy ekenin saraptaǵan bolatynbyz.