Tsıfrlandyrý jaı esep úshin emes, naqty ónimdilikke jumys isteýi kerek - Áshimbaev
ASTANA. KAZINFORM – Memleket bergen sýbsıdııanyń nátıjesi aıqyn kórinýi tıis. Bul týraly agroónerkásiptik keshen men sý sharýashylyǵyn tsıfrlandyrý máselelerine arnalǵan Parlamenttik tyńdaýda Senat tóraǵasy Máýlen Áshimbaev málim etti.
- Taǵy bir mańyzdy mindet – agroónerkásip sýbektilerin memlekettik qoldaýdy obektıvti tsıfrlyq derektermen baılanystyrý. Memlekettik qoldaý tetikteri naqty kórsetkishterge súıenýi qajet. Eger memleket zamanaýı tehnologııalarǵa sýbsıdııa berse, onyń nátıjesi de aıqyn kórinýge tıis dep esepteımiz. Qansha sý únemdeldi, ónimdilik qalaı ózgerdi, mal sharýashylyǵynyń tıimdiligi naqty qanshalyqty artty, jerdi paıdalaný tıimdiligi qalaı jaqsardy degen saýaldarǵa tsıfrlyq platforma aıasynda jaýap berilý kerek. Mundaı tásil bıýdjet qarajatyn bólýdi barynsha ashyq jáne qoldaý sharalaryn nysanaly ári nátıjeli etetini sózsiz. Osylaısha, tsıfrlandyrý jaı esep úshin nemese tek aqparat úshin emes, salanyń naqty ónimdiligin arttyrý jáne jańa basqarý tehnologııalaryn engizý úshin jumys isteýi kerek. Aldaǵy ýaqytta osy baǵytta naqty qadamdar jasalady dep senemiz, - dedi M.Áshimbaev.
Onyń paıymynsha, bul saladaǵy tsıfrlyq transformatsııa óńirlik basqarýmen tyǵyz baılanysqanda ǵana nátıjeli bolady. Óıtkeni aýyl jáne sý sharýashylyǵy – eń aldymen, naqty aýmaqtar, aýdandar, sharýashylyqtar, kanaldar men egis alqaptary degen sóz.
- Sondyqtan jergilikti atqarýshy organdar ortalyqtandyrylǵan aqparattyq júıelerdiń jaı ǵana paıdalanýshysy bolmaýy kerek dep esepteımiz. Jergilikti memlekettik organdar, tıisti qurylymdar osy jumystyń belsendi qatysýshysy bolýǵa tıis. Ár óńir boıynsha tsıfrlyq qamtý deńgeıi, avtomattandyrý dárejesi, sý shyǵynyn azaıtý sııaqty naqty ındıkatorlar qajet. Sý únemdeý tehnologııalaryn engizý jáne sharýalar úshin tsıfrlyq servısterdiń qoljetimdiligi de mańyzdy másele. Árıne, qolǵa alynǵan sharalardyń tıimdiligi, túptep kelgende, olarmen jumys isteıtin mamandarǵa tikeleı baılanysty. Sondyqtan agroónerkásip kesheni men sý sharýashylyǵyn tsıfrlandyrý úshin kadr daıarlaý – basty maqsattardyń biri. Osy baǵytta memleket, joǵary oqý oryndary, ǵylym jáne salalyq uıymdar arasyndaǵy baılanysty nyǵaıta túsken abzal, - dedi Senat tóraǵasy.
Aıta keteıik, sý únemdeý tehnologııalary arqyly byltyr 874 mln tekshe metr sý únemdelgenin jazǵan edik.
