Tsıfrlandyrý jáne JI engizý ult damýyn laıyqty deńgeıde qamtamasyz etedi – Máýlen Áshimbaev

ASTANA. KAZINFORM – Tsıfrlandyrý men jasandy ıntellekt engizý Qazaqstan damýynyń mańyzdy komponenti. Ol búgin ult damýynyń laıyqty deńgeıin qamtamasyz etse, erteń onyń básekege qabilettiligin arttyrady. Mundaı pikirdi Senat tóraǵasy Máýlen Áshimbaev «Vremıa» gazetinde jaryq kórgen «Reforma logıkasy: Qýatty óńirler – qýatty ult» maqalasynda bildirdi.

Senat spıkeri qazirgi ýaqytta tsıfrlandyrý protsesiniń tsıfrlyq teńsizdikti eńserýge, tsıfrlyq tehnologııalardy kúndelikti ómirge jáne ekonomıkaǵa yqpaldastyrýǵa baǵyttalǵanyn atap ótedi.

- Tsıfrlandyrýdyń ekinshi tolqyny memlekettik qyzmetterdiń salystyrmaly túrde tar segmentinen tsıfrlyq teńsizdikti joıýǵa, tsıfrlyq tehnologııalardy kúndelikti ómir men ekonomıkaǵa yqpaldastyrýǵa baǵyttalǵan... Alaıda shaǵyn qalalarda, qala mańynda jáne aýyldarda baılanys arnalary qatty eskirgen. Munda negizinen ADSL tehnologııasy, ıaǵnı «mys» telefon arnalary taratý jyldamdyǵy sekýndyna 10 Mbıt qana. Keń jolaqty qosylýdy qamtamasyz etetin talshyqty-optıkalyq ınternet aýyldyq jerlerde tek 18, shaǵyn qalalarda 28 paıyz bolsa, al iri qalalarda bul kórsetkish 44 paıyzǵa jetedi. Sonymen qatar Qazaqstandaǵy aýyldyq eldi mekenderdiń ornalasýy baılanys operatorlary úshin ekonomıkalyq jaǵynan tartymdy emes. Olar halyq tyǵyz ornalasqan qalalar men bıznes shoǵyrlanǵan aımaqtardy jón kóredi. Bul kez kelgen eldi mekenderden tys ornalasqan aýyl sharýashylyǵy kásiporyndaryn nemese elsiz tas joldardyń boıyn qamtýdy aıtpaǵannyń ózinde, - delingen maqalada.

Maýlen Áshimbaev tsıfrlyq teńsizdikke júıeli jaýap retinde «Qoljetimdi ınternet» ulttyq jobasynyń iske qosylǵanyn atap ótti. Bul joba Qasym-Jomart Toqaevtyń tapsyrmasymen 2023 jyldyń qazan aıynda qabyldandy. Onyń maqsaty — 2027 jylǵa deıin barlyq eldi mekendi jyldamdyǵy keminde sekýndyna 100 Mbıt bolatyn ınternetpen qamtamasyz etý.

- 3 myńnan astam aýylda talshyqty-optıkalyq baılanys jelilerin salý jumystary júrip jatyr, al joǵary jyldamdyqty ınternet shaǵyn jáne orta baılanys operatorlarynyń qoldaýymen 400 myńǵa jýyq úı sharýashylyǵyna jetedi. Eger aýyldardyń shalǵaılyǵyna nemese geografııalyq qıyndyqtarǵa baılanysty symdy ınternet tartý múmkindigi bolmasa, onda ǵaryshtyq baılanys júıesiniń resýrstary paıdalanylady. Mundaı 500-den astam aýyl bar... Áleýmettik ınfraqurylymdy damytý – Qazaqstan bolashaǵyna strategııalyq ınvestıtsııa. Onyń sátti iske asyrylýy shıkizattyq ekonomıkadan adam kapıtalyna negizdelgen ekonomıkaǵa ótý úshin katalızator bolady. Ol tek ómir deńgeıindegi teńsizdik máselesin ǵana sheship qoımaı, ondaǵan jyl buryn turaqty damýdyń, áleýmettik turaqtylyqtyń jáne óńirlerdiń ekonomıkalyq básekege qabilettiliginiń negizin qalaıdy, - dedi Maýlen Áshimbaev.