Tsıfrlandyrý jáne jasandy ıntellekt jylyn sán qýyp, urandatý úshin jarııalaǵan joqpyz — Toqaev

QYZYLORDA. KAZINFORM — Tsıfrlandyrý jáne jasandy ıntellekt jylyn sán qýyp, urandatý úshin jarııalaǵan joqpyz. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.

— Biz bilim, ǵylym jáne joǵary tehnologııa salasyna qomaqty ınvestıtsııa salatyn boldyq. Sebebi adam kapıtalynyń sapasyn arttyrý — aıryqsha mańyzdy mindet. Bul, ásirese, el damýynyń qazirgideı tarıhı, betburysty kezeńinde halqymyzdyń bolashaǵyna tikeleı áserin tıgizedi. Eń bastysy — bul josparlar jurtty qur ýádemen jarylqaıtyn tusaýkeser rásimderi men forýmdardyń kóleńkesinde qalyp qoımaýy kerek. Biz pıar-aktsııalar men kóz aldaıtyn jalǵan ilgerileýge emes, naqty jetistikke umtylýymyz qajet. Tsıfrlandyrý jáne jasandy ıntellekt jylyn sán qýyp, urandatý úshin jarııalaǵan joqpyz. Bul sheshim búkil memlekettik apparatqa naqty mindet júktep otyr. Bul — strategııalyq mindet, — dedi Prezıdent.

Qasym-Jomart Toqaev memleket úshin aıryqsha mańyzdy osy mindetti oryndaýǵa qatysty talap ta óte joǵary bolatynyn eskertti.

— Bul baǵyttaǵy jumystyń nátıjesi naqty ári kózge kórinetin kórsetkishtermen ólshenýi tıis. Atap aıtqanda, sheshim qabyldaý merzimin qysqartýǵa, eńbek ónimdiligin arttyrýǵa jáne qyzmet sapasyn jaqsartýǵa oń yqpal etýi kerek, — dedi Memleket basshysy.

Budan buryn Qasym-Jomart Toqaev vıtse-prezıdent laýazymyn bekitýdi usyndy.