«Tsıfrlandyrý jáne jasandy ıntellekt»: Jezqazǵanda jastar forýmy ótti
JEZQAZǴAN. KAZINFORM — Jezqazǵan qalasynda óńirlik jastar forýmy joǵary deńgeıde ótti. Іs-shara Ulytaý oblysy ákimdigi qoldaýymen jáne Aýyl partııasy óńirlik fılıalynyń uıymdastyrýymen júzege asyryldy, dep habarlaıdy Ulytaý oblysy ákimdiginiń baspasóz qyzmeti.
«Tsıfrlandyrý jáne jasandy ıntellekt» taqyrybyn arqaý etken forýmǵa oblystyń túkpir-túkpirinen jınalǵan jastar qatysyp, zamanaýı tehnologııalar men bolashaq mamandyqtar týraly keńinen aqparat aldy.
Forým baǵdarlamasyna sáıkes sektsııalyq jumystar barysynda IT jáne jasandy ıntellekt baǵyttary boıynsha bilikti sala mamandary mazmundy dárister ótkizdi.
Sonymen qatar, aýyl jastary Alǵys hattarmen marapattalyp, partııa qataryna jańadan qabyldanǵan jastarǵa partııalyq bıletter men tósbelgiler tabystaldy.
— Atap aıtqanda, Mereke Batyrbekqyzy «Aýyl jastarynyń keshegi, búgini, erteńi» taqyrybynda oı qozǵap, jastar saıasatynyń mańyzyn atap ótti. Aıym Mavlen jasandy ıntellekt quraldary arqyly kontent jasaý joldaryn túsindirse, Oljas Sáýkenov kıberqaýipsizdik pen kıbergıgıena máselelerine toqtaldy. Interaktıvti bólimde Іnjýtas hanym jastarmen oıyn formatynda sergitý jattyǵýlaryn ótkizip, qatysýshylardyń belsendiligin arttyrdy, — delingen habarlamada.
Sonymen qatar, Álibek Qarataev jastarǵa jasandy ıntellekt salasyndaǵy múmkindikterdi tanystyryp, bolashaq mamandyqty durys tańdaýdyń mańyzdylyǵy týraly qundy pikirlerimen bólisti.
Forýmnyń arnaıy qonaǵy, headliner — Móldir Áýelbekova jastarmen erkin formatta suhbattasyp, olardyń suraqtaryna jaýap berip, tájirıbelik keńesterimen bólisti.
Іs-shara barysynda qatysýshylar úshin qyzyqty oıyndar uıymdastyrylyp, ınteraktıvti formattaǵy suraq-jaýap alańdary ótti. Forým jastarǵa jańa serpin berip, olardyń kásibı jáne tulǵalyq damýyna baǵyttalǵan mańyzdy alańǵa aınaldy.
