Tsıfrlandyrý, robottandyrý jáne JI engizý: mashına jasaý salasyndaǵy kelesi qadamdar
ASTANA. KAZINFORM – Sektordyń tehnologııalyq deńgeıi joǵarylaıdy. Bul jóninde QR Premer-mınıstri Oljas Bektenov Qazaqstan mashına jasaýshylarynyń XIII forýmynda málimdedi.
– Ónimniń tehnologııalyq deńgeıi – jahandyq básekelestik jaǵdaıynda negizgi faktorlardyń biri. Shyn máninde, bul – tsıfrlandyrý, robottandyrý jáne jasandy ıntellektini engizý degen sóz. Atalǵan úderister Prezıdent qoıǵan aýqymdy mindetter aıasynda aıryqsha mańyzdy. Memleket basshysy Qasym-Jomart Kemeluly Toqaev atap ótkendeı, Qazaqstan óńirdegi jetekshi tsıfrlyq habtardyń birine aınalýǵa tıis, - dedi O. Bektenov.
Sonymen birge zaýyttarda jańa tehnologııalardy qoldaný aýqymdy transformatsııanyń negizgi elementine aınalady.
– Álemdik tájirıbe kórsetkendeı, óndiriste jasandy ıntellektini qoldaný jabdyqtarǵa tehnıkalyq qyzmet kórsetý shyǵyndaryn 40%-ǵa deıin tómendetedi, - dedi Premer-mınıstr.
Onyń aıtýynsha, Qazaqstanda da mundaı tabysty mysaldar bar. Máselen, «SaryarqaAvtoProm» kásipornynda jasandy ıntellekt shyǵýy múmkin aqaýlardy aldyn ala boljap, konveıerdiń kenetten toqtap qalýyna jol bermeıdi. Al ERG tobynda tsıfrlyq assıstentter men taldamalyq platformalar logıstıkadan bastap elektr energııasyn tutynýǵa deıingi protsesterdi ońtaılandyrady. Sonyń nátıjesinde kompanııa ótken jyly shamamen 55 mlrd teńge únemdedi.
– Bul aqyldy tehnologııalardyń naqty ekonomıkalyq paıda ákeletinin aıqyn kórsetedi. Endi ishinara avtomattandyrýdan kelesi kezeńge ótip, «aqyldy zaýyttardy» iske qosý josparlanyp otyr. Jobalaý men ónimniń sapasyn basqarý úshin jasandy ıntellektini paıdalaný qajet. Bul otandyq óndirýshilerdiń tek básekege qabiletti bolýyn ǵana emes, uzaqmerzimdi perspektıvada jahandyq naryqtarda jańa sapa standarttaryn qalyptastyrýyna múmkindik beredi, - dedi O. Bektenov.
Aıta keteıik, buǵan deıin otandyq mashına jasaý salasy jınaqtap-qurastyrýdan ósip, jańa deńgeıge kóteriletinin jazǵanbyz.
