Tsıfrlandyrý Pavlodar óńirindegi órt oqıǵalaryn azaıtýǵa sep bolyp otyr
PAVLODAR. KAZINFORM - Jyl basynan beri oblysta dala jáne orman alqaptarynda 23 ret órt oqıǵasy tirkelgen. Bul ótken jyldyń uqsas kezeńimen salystyrǵanda 30 paıyz az.
Óńirde mamyr aıynyń sońynan beri aptap ystyq tur. Soǵan oraı órt qaýpiniń eń joǵary besinshi deńgeıi jarııalanǵan.
- Qazir oblys aýmaǵynda órt qaýipti deńgeıi joǵary dep sanalady. Sol sebepti departament qyzmetkerleri qaýipti kezeń bastalǵaly 800-den astam reıdtik sharalar júrgizdi. Jyl basynan beri oblysta 23 ret órt bolǵan. Byltyrǵymen salystyrǵanda edáýir azaıǵan. Orman jáne dala órtterin erte anyqtap, der kezinde sóndirý úshin zamanaýı tsıfrlyq tehnologııalar qoldanylyp jatyr. Orman sharýashylyqtaryndaǵy munaralarǵa ornatylǵan baqylaý kameralary táýlik boıy jumys isteıdi. Olar aýmaqty sholyp, tútindi ondaǵan shaqyrym jerden anyqtaı alady, - deıdi oblystyq Tótenshe jaǵdaılar departamenti josparlaý jáne jedel basqarý ortalyǵy bastyǵynyń orynbasary Damır Abylqaıyrov.
«Ertis ormany» rezervaty aýmaǵynda 23 kamera ornatylǵan. Sonymen qatar orman-toǵaılarda oblys ákimdiginiń jer qoınaýyn paıdalaný basqarmasyna qarasty 18 kamera bar. Qazir taǵy 8 kamera ornatylyp jatyr. Al Baıanaýyl memlekettik ulttyq tabıǵı parkinde 8 kamerany iske qosý protsesi júrip jatyr.
Eske sala keteıik, «Ertis ormanynda» órt qaýiptiliginiń tótenshe deńgeıi jarııalandy.
