Tsıfrlandyrý nátıjesinde qurylys salasynyń tıimdiligi 46 paıyzǵa artady
ASTANA. KAZINFORM — Bul týraly Úkimet otyrysynda Premer-Mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev aıtty.
- Memleket basshysynyń tapsyrmasyn oryndaý maqsatynda Jasandy ıntellekt jáne tsıfrlyq damý mınıstrligi Ónerkásip jáne qurylys mınıstrligimen birlesip, qurylys salasyn tsıfrlyq transformatsııalaý kartasyn iske asyryp jatyr. Qujat protsesterdi tsıfrlandyrý arqyly salanyń tıimdiligin arttyrýǵa jáne qala qurylysy josparlaý júıesin jetildirýge baǵyttalǵan. Qazirgi tańda 20 bıznes-protsess tsıfrlandyryldy, - dedi ol.
Vıtse-premerdiń málimetinshe, elektrondyq kelisimsharttar, qujattardy avtomatty tekserý, tsıfrlyq aktiler, API arqyly monıtorıng jáne BIM-tehnologııalar engiziledi.
- Nátıjesinde rásimderdiń ashyqtyǵy artyp, qyzmet kórsetý merzimderi qysqaryp, salanyń tıimdiligi 46 paıyzǵa deıin ósedi. Búginde qurylys salasynda 54 memlekettik qyzmet kórsetiledi jáne barlyǵy onlaın formatta qoljetimdi. Bul azamattar men bıznes úshin qyzmet alýdy jeńildetedi. Jyljymaıtyn múlikke mekenjaı berý, jobalaýǵa arnalǵan materıaldardy usyný, nysandardy kádege jaratýǵa ruqsat berý jáne eskızdik jobalardy kelisý boıynsha qyzmetter asa suranysqa ıe. Negizgi júkteme josparlaý jáne jobalaý kezeńderine tıesili. 2025 jyldyń qorytyndysy boıynsha qyzmetterdiń 96 paıyzy elektrondyq formatta kórsetildi. Bul salany tsıfrlandyrý deńgeıiniń joǵary ekenin kórsetedi, - dedi Jaslan Mádıev.
Aıta keteıik, Otbasy bank 70 myń salymshyǵa 1,6 trln teńge jeńildetilgen ıpotekalyq qaryz beredi.
