Tsıfrlandyrý men JI Qazaqstannyń jańa damý kezeńine jol ashady – Prezıdent
ASTANA. KAZINFORM – Jappaı tsıfrlandyrý men jasandy ıntellekt tehnologııalary adamzat úshin buryn-sońdy bolmaǵan múmkindikter keńistigin qalyptastyryp otyr. Memleket basshysy Qasym-Jomart Toqaev bul tarıhı múmkindikti bolashaqqa baǵdarlanǵan halyqtar ǵana tıimdi paıdalana alatynyn aıtty.
– Myńnyń birine beriletin dál osy tarıhı múmkindikti tek qýatty, kúshti, bolashaqqa baǵdar túzegen halyqtar paıdalana alady. Bul mindetti eńserý bizdiń óskeleń urpaqtyń qolynan keledi. Men buǵan senimdimin. Qazaqstannyń ornyqty damýynyń negizinde uly tarıhymyz, odan kem túspeıtin qazirgi sát jáne, eń bastysy, jarqyn bolashaq arasyndaǵy ajyramas baılanys jatyr, – dedi Qasym-Jomart Toqaev Astanada Memlekettik Tý kóterý rásiminde.
Memleket basshysy Qazaqstannyń jańa turpatty elge aınalǵanyn, birtutas ári jasampaz ult retinde damýdyń dańǵyl jolyna túskenin atap ótti.
– Keıingi jyldardy elimiz úshin tarıhı betburys kezeńi deýge tolyq negiz bar. Aýqymdy reformalar barlyq salaǵa tyń serpin berýde. Túbegeıli ózgerister, ásirese, qoǵamdyq sanaǵa zor silkinis ákeldi. Іshki saıasattyń mazmuny jańardy, baǵyt-baǵdary aıqyndala tústi. El ishinde janashyrlyq, eńbekqorlyq, uqyptylyq, únemshildik qasıetteri ornyǵa bastady, – dedi Q. Toqaev.
Azamattarymyzdyń kózqarasy jáne ustanymy ózgerýde. Halqymyz Ádiletti, Mádenıetti, Taza jáne Qaýipsiz elde ómir súrýdi qalaıdy.
– Sondyqtan jurtymyz tártip buzýshylyqqa, zańsyzdyqqa tutas qoǵam bolyp tosqaýyl qoıýda. Alaıda, aldymyzda turǵan jumys – óte aýqymdy. Bul jumysty bárimiz bir el, birtutas halyq bolyp mindetti túrde oıdaǵydaı oryndaımyz, – dedi Prezıdent.
Aıta keteıik, 4 maýsymda elimizde Memlekettik rámizder kúni atap ótiledi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.
Prezıdent bul kún – qazaq eliniń árbir azamaty úshin mańyzy erekshe mereke ekenin aıtty.
Sondaı-aq, Qasym-Jomart Toqaev Táýelsizdigimizdiń 35 jyldyǵyn naqty nátıjelermen qarsy alý kerektigin tapsyrdy.
