Tsıfrlandyrý men jasandy ıntellektini barlyq salaǵa engizý kerek – Prezıdent
BÝRABAI. KAZINFORM – Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda jappaı tsıfrlandyrý men jasandy ıntellektini barlyq salaǵa keńinen engizý týraly aıtty.
− Qazir qaı eldiń jańa tehnologııalardy óz paıdasyna jarata alatyny, qaı eldiń kósh sońynda qalatyny anyqtalyp jatqan sheshýshi kezeńge qadam bastyq. Ekonomıkanyń barlyq salasy jáne eńbek naryǵy JI tikeleı qatysýymen túbegeıli ózgerip jatyr. Adamzat tirshiliginiń máni men qalyby basqasha sıpat alyp barady. Osy oraıda ınnovatsııalar ekonomıkasy degen jańa qubylys paıda boldy. Onda ózgeshe oılaý qabileti, shyǵarmashylyq turǵydaǵy jańashyldyq jáne áleýmettik daǵdylar aldyńǵy qatarǵa shyǵady, − dep atap ótti Qasym-Jomart Toqaev.
Sondaı-aq, JI qoldaný bıýdjet qarajatyn paıdalaný tıimdiligin barynsha arttyrýǵa, salyq jáne keden isin júrgizýdiń sapasyn jaqsartýǵa, memlekettik satyp alý salasyn ońtaılandyrýǵa, azamattar men memleket arasyndaǵy ózara is-qımyldy odan ári jeńildetýge múmkindik beredi.
− Quzyrly memlekettik organdar sarapshylarmen jáne ІT-mamandarmen qoıan-qoltyq jumys isteı otyryp, artyq shyǵyndardy azaıtýǵa, barlyq salanyń ashyqtyǵyn qamtamasyz etip, ónimdiligin arttyrýǵa arnalǵan tyń tásilder izdep taýyp, ony qoldanysqa engizip otyrýǵa tıis. Men bul máseleni erekshe baqylaýda ustaımyn, − deıdi Memleket basshysy.
Aıta keteıik, «Jaıly mektep» qurylysy máz emes. Osyǵan oraı Prezıdent tekserý júrgizedi.