Tsıfrlandyrý, maman daıarlaý: Qazaqstan Qytaı kompanııasymen memorandýmǵa qol qoıdy

ASTANA. KAZINFORM - Sý resýrstary jáne ırrıgatsııa mınıstrligi men Qytaıdyń Power China kompanııasy sý sharýashylyǵy salasyndaǵy ózara túsinistik pen yntymaqtastyq týraly memorandým jasasty, dep habarlaıdy mınıstrliktiń baspasóz qyzmeti.

Qujatqa Sý resýrstary jáne ırrıgatsııa birinshi vıtse-mınıstri Nurlan Aldamjarov pen Power China International dırektorlar keńesiniń hatshysy, Eýrazııalyq óńirlik shtabtyń vıtse-prezıdenti Go Tszıýnı qol qoıdy.

Qujat gıdrotehnıkalyq qurylystardy jańǵyrtý jáne ırrıgatsııalyq júıelerdi rekonstrýktsııalaý, birlesken baǵdarlamalar arqyly kásibı kadrlardy daıarlaý jáne tájirıbe almasý, sý sharýashylyǵyn tsıfrlandyrý, ınvestıtsııalar tartý, sýdy únemdeý jáne resýrstardy tıimdi paıdalaný, ǵylymı zertteýler men tehnıkalyq yntymaqtastyq, sondaı-aq jerasty sýyn basqarý salasyndaǵy mamandar úshin oqytý jáne biliktilikti arttyrý baǵdarlamalaryn uıymdastyrý sııaqty baǵyttar boıynsha ekijaqty yntymaqtastyqty damytýdy kózdeıdi.

«QHR Saýda mınıstrligine, Sý sharýashylyǵy mınıstrligine jáne Power China kompanııasyna Qazaqstannyń sý salasy mamandaryna arnalǵan oqý kýrstaryn uıymdastyrǵany úshin alǵysymdy bildirgim keledi. Bıyl oqýǵa tórt top qatysyp, barlyǵy 125 maman biliktiligin arttyrdy. Qol qoıylǵan memorandým aıasynda bul yntymaqtastyq jalǵasyn taýyp, aldaǵy ýaqytta da sý salasy qyzmetkerleri úshin osyndaı trenıngter ótkiziledi dep úmittenemiz», – dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.

Aıta keteıik, kelesi jyly Qytaıda taǵy 200 qazaqstandyq maman biliktilikti arttyrý kýrstarynan ótedi dep josparlanyp otyr. Bıylǵydaı, barlyq shyǵyndy qytaılyq tarap óz moınyna alady.

Osyǵan deıin jappaı tsıfrlandyrý, jasandy ıntellekt Joldaýdyń negizgi arqaýy bolǵany týraly jazdyq.