Tsıfrlandyrý esebinen bıýdjetke qosymsha 410 mlrd teńge tústi – Qarjy mınıstri
ASTANA. KAZINFORM – Tsıfrlandyrý esebinen memlekettik bıýdjetke qosymsha 410 mlrd teńge túsim qamtamasyz etildi. Bul týraly Úkimet otyrysynda Qarjy mınıstri Mádı Tákıev málimdedi.
Mınıstrdiń aıtýynsha, «Digital Qazaqstan» strategııasy aıasyndaǵy negizgi mindet – jekelegen baǵyttardy avtomattandyrýmen shektelmeı, memlekettik qarjyny basqarýdyń biryńǵaı júıesin qalyptastyrý.
– Bul júıede árbir sheshim naqty málimetterge negizdeledi, al josparlaýdan bastap naqty paıdalanýǵa deıingi árbir teńge ashyq ári baqylaýda bolady. 2029 jylǵa deıin bul tásil memleket, bıznes jáne azamattar úshin barlyq negizgi baǵyttarǵa taralady, – dedi Mádı Tákıev.
Onyń aıtýynsha, tsıfrlyq transformatsııanyń negizgi baǵyttarynyń biri – Memlekettik kirister komıtetin fıskaldyq derekter fabrıkasyna aınaldyrý.Qazir salyq júıesinde 3,9 mlrd operatsııa júrgizilgen, 1,8 mlrd shot-faktýra rásimdelgen. Sonymen qatar 17,7 mlrd qujat táýekelderdi basqarý júıesi arqyly óńdelgen. «Smart Data Finance» júıesi arqyly 99 myń habarlama joldanyp, 2,9 mln tranzıttik deklaratsııa tirkelgen.
– Eń bastysy – tsıfrlandyrý naqty qarjylyq nátıje berýde. Tsıfrlandyrý esebinen qosymsha túsimder 410 mlrd teńgeni qurady. ıAǵnı aqparattyq málimetter tek baqylaý quraly emes, sonymen qatar bıýdjettiń qosymsha kiris kózine aınalyp jatyr, – dedi mınıstr.
Sonymen qatar Mádı Tákıev ekonomıkalyq belsendilikti kóleńkeden shyǵarýǵa baǵyttalǵan jumystarǵa da toqtaldy. 2026 jyldan bastap ózin-ózi jumyspen qamtyǵan azamattarǵa arnalǵan arnaıy salyq rejımi engizildi. Onyń aıasynda tsıfrlyq platforma salyq agenti retinde 4% mólsherinde áleýmettik tólemderdi ustap qalady.
Qazirgi tańda júıege Yandex, inDrive, Wolt, Glovo jáne basqa da servısterdi qosa alǵanda, 38 platforma qosylǵan.
– Nátıjesinde jumyspen qamtylǵandar sany 14,5 myńnan 805 myń adamǵa deıin, al áleýmettik tólemder 1,4 mlrd teńgeden 16,1 mlrd teńgege deıin ósti, – dedi Qarjy mınıstri.
Onyń málimetinshe, 600 myńnan astam tirkelmegen tulǵa resmı ekonomıkalyq aınalym aıasyna qosylǵan.
– Osylaısha, tsıfrlandyrý ekonomıkany baqylaýmen ǵana shektelmeı, azamattar men bızneske qosymsha ákimshilik júkteme túsirmeı, qyzmetin zańdastyrýǵa múmkindik beredi, – dep atap ótti Mádı Tákıev.
Aıta keteıik, teńgeniń nyǵaıýy bıýdjet kirisin azaıtqan edi.
