Tsıfrlandyrý álemdegi ornyqty damý ındıkatorlarynyń 70 paıyzyna yqpal etedi
ASTANA. KAZINFORM — Búgin Parlament Senatynda Qazaqstannyń Ornyqty damýy salasyndaǵy ulttyq maqsattar men mindetterdiń iske asyrylýyn monıtorıngileý jónindegi parlamenttik komıssııanyń XI otyrysy ótip jatyr.
— Búgin Ornyqty damý maqsattaryna qol jetkizýge tsıfrlyq ózgeristerdiń áseri týraly máselelerdi talqylaımyz. Ózderińizge belgili, Prezıdent Qasym-Jomart Toqaev úsh jyl ishinde Qazaqstandy jappaı tsıfrlyq elge aınaldyrýdy mindet etip júktedi. Osyǵan baılanysty Úkimet tsıfrlandyrý isi men jasandy ıntellektini damytýǵa arnalǵan Digital Qazaqstan birtutas strategııasyn ázirlep, ony josparly túrde iske asyrýǵa tıis. Shyn máninde, tsıfrlandyrý — sross-sector-lyq protsess. Ol eń aldymen, eldiń ornyqty damýynyń katalızatory jáne irgeli faktory ekeni anyq. Tsıfrlyq tehnologııalar — ekonomıkanyń básekege qabilettiliginiń jáne azamattardyń ómir súri sapasyn arttyrýdyń mańyzdy tetigi. Tsıfrlyq tehnologııalar ınklıýzıvti bilim berý men sapala densaýlyq saqtaýdy aıtarlyqtaı damytýǵa da yqpal ete alatyny sózsiz. Sondaı-aq genderlik teńdikti, teńgerimdi ekonomıkalyq ósýdi jáne qorshaǵan ortany qorǵaýdy qamtamasyz etetin sharalardy kúsheıtedi, — dedi Senat tóraǵasy Máýlen Áshimbaev.
Osy oraıda Senat tóraǵasy tsıfrlandyrý qarjylyq ınklıýzııany qamtamasyz etýde memlekettik basqarýdyń tıimdiligin arttyrýda mańyzdy ról atqaratynyn aıtty. Osynyń bárin eskerip, sarapshylar tsıfrlandyrý álemdegi ornyqty damý maqsattarynyń negizgi ındıkatorlarynyń 70 paıyzyna qol jetkizýge yqpal etetinin aıtyp otyr. Ulttyq ekonomıka mınıstrliginiń derekteri boıynsha elimizdegi ornyqty damý maqsattarynyń 93 paıyzy elektrondy platformalar arqyly baqylanady.
— Jalpy, Qazaqstanda ІT-ekojúıe halyqaralyq deńgeıde damyp kele jatqanyn bárimiz bilemiz. Biraq, oǵan toqmeıilsýge bolmaıdy. Tsıfrlyq ózgeris ornyqty damý maqsattaryna qol jetkizýge óziniń tikeleı jáne somdy úlesin is júzinde qosýy kerek. Sondyqtan tsıfrlyq sheshimderdi olar nátıje beretin, tıimdilikti ári ashyqtyqty jáne azamattardyń ómir súrý sapasyn arttyratyn jerlerde paıdalaný aıryqsha mańyzǵa ıe. Bul salada tıimdi quqyqtyq baza qajet. Osy maqsatpen Senat qazir «Jasandy ıntellekt týraly» zańdy qarap jatyr. Ol jańa tehnologııalardy basqarýdyń jáne damytýdyń zańnamalyq bazasyn qalyptastyrýǵa arnalǵan. Sondaı-aq, Parlamentte Tsıfrlyq kodekstiń jobasy belsendi talqylanyp jatqanyn atap ótken jón. Bul qujat — tsıfrlyq quqyqtyq qatynastardyń negizgi erejelerin belgileıtin alǵashqy keshendi zańnamalyq akti bolady dep kútilýde. Jalpy, depýtattyq korpýs Qazaqstanda ornyqty damý maqsattaryn jáne tsıfrlyq kún tártibin ilgeriletý jolynda júıeli jumys júrgizip keledi, — dedi Máýlen Áshimbaev.
Budan buryn habarlanǵandaı, oqýshylar arasynda alǵash ret qarjylyq saýattylyq pen tsıfrlyq qaýipsizdik olımpıadasy ótedi.