TShO Teńiz jáne Korolev ken oryndaryndaǵy óndiristi ýaqytsha toqtatty

ATYRAÝ.KAZINFORM – «Teńizshevroıl» kompanııasy saqtyq sharasy retinde Teńiz jáne Korolev ken oryndaryndaǵy óndiristi ýaqytsha toqtatqanyn rastady.

Kompanııanyń habarlaýynsha, bul sheshim óndiristik nysandardaǵy elektr energııasyn taratý júıeleriniń keıbir bólikterinde týyndaǵan máselelerge baılanysty qabyldanǵan.

- Zardap shekkender joq, al qyzmetkerlerdiń qaýipsizdigi kompanııa úshin eń joǵary basymdyq bolyp qala beredi. TShO-nyń tehnıkalyq qyzmetteri oqıǵanyń bastapqy sebebin anyqtaý boıynsha belsendi jumys júrgizip jatyr. Al negizgi maqsat – qalyptasqan jaǵdaıdy qaýipsiz túrde joıý. Kompanııa atalǵan jaǵdaıdyń yqtımal saldaryn barynsha azaıtý maqsatynda memlekettik organdarmen tyǵyz ózara is-qımylda jumys atqaryp jatyr,- dep málimdedi «Teńizshevroıl» JShS baspasóz qyzmeti.

Eske salaıyq, 18 qańtarda Teńiz ken ornynda órt bolyp, 450-den asa jumysshy evakýatsııalanǵanyn habarlaǵan edik.