TShO: SSER kompanııasymen kelisimshart buzylǵan joq
NUR-SULTAN. QazAqparat - «Teńizshevroıl» resmı ókili SSER kompanııasy jańa zaýyttyń qurylysy aıaqtalǵanǵa deıin jumys isteıtinin málimdedi, dep habarlaıdy QazAqparat QR Energetıka mınıstrligine silteme jasap.
Búgin «Teńizshevroıl» kompanııasynyń úkimet jáne qoǵammen baılanys bóliminiń bas menedjeri Ryzabek Artyǵalıev brıfınge habarlaǵandaı, áleýmettik jelilerde taralǵan TShO men SSER merdiger kompanııasynyń kelisimshartty buzǵany týraly aqparat shyndyqqa janaspaıdy.
Ol jýrnalısterdiń suraqtaryna jaýap bere otyryp, Teńiz ken ornynan sheteldik jumysshylardyń evakýatsııalanyp jatqany týraly áleýmettik jelilerde vıdeosymen birge tarap júrgen aqparattyń jalǵan ekenin aıtty. Artyǵalıev kún saıyn Teńizde bolatyn vahta almasý ekenin naqtylady.
«Kóptegen adam deportatsııalandy degen aqparat tarap jatyr. Onyń ishinde 780 azamat qytaılyq eken degen málimet te júr. Bizdiń Teńizde eshqandaı Qytaı kompanııasy joq. Mundaı aqparattyń qaıdan shyqqanyn bilmeımin. Munyń barlyǵy ótirik. Kimdi deportatsııalaǵanyn memlekettik organdardan surańyzdar. Bizde ondaı aqparat joq», - dep málimdedi R.Artyǵalıev.
Sondaı-aq, bolashaqta keńeıtý jobasynda 25 myń adamnyń baryn, onyń ishinde bir myńǵa jýyǵy - sheteldik azamattar ekenin atap ótti. 15 myń adam jumys isteıtin negizgi óndiris bar. Barlyǵy 40 myń adamdy quraıdy. Negizgi óndiriste jumys toqtamaǵanyn málimdedi.
R.Artyǵalıevtyń aıtýynsha, «Bolashaqta keńeıtý jobasy» úshinshi býyn zaýyty (BKJ ÚBZ) qurylys alańynda ýaqytsha jumys toqtatylǵan. Olar taıaý ýaqytta iske qosylady. TShO-nyń barlyq óndiristik nysandary shtattyq rejimde jumys istep tur.
R.Artyǵalıev SSER arab kompanııasyna qatysty mynany málimdedi: «BKJ ÚBZ qurylys alańynda 15-16 kompanııa jumys isteıdi. Al, SSER kompanııasynda 8 myń adam, sonyń ishinde 600 myńnan astamy - sheteldik azamat. Ol iri merdigerlerdiń biri, TShO atalǵan kompanııamen 2018 jyldan beri jumys istep keledi. Jańa zaýyttyń qurylysy aıaqtalǵanǵa deıin jumys isteıdi».
Sonymen qatar, ol «Teńizshevroıl» kompanııasynyń óz qyzmetkerlerin Teńizden evakýatsııalamaǵanyn, olardyń sonda jumys istep jatqanyn habarlady. 29 maýsymda qaıǵyly oqıǵadan zardap shekken 30-dan astam adam Atyraýǵa jetkizilgen.
«Eshkim qurban bolǵan joq, áleýmettik jelilerde tarap jatqan aqparattyń barlyǵy shyndyqqa janaspaıdy. Onyń bári jalǵan. Eshkim aýyr jaraqat alǵan joq», - dep málimdedi Ryzabek Artyǵalıev jýrnalısterge bergen suhbatynda.
