TShO-ny bolashaqta keńeıtý jobasynda aınalmaly sýmen qamtý júıesi qoldanylady
ASTANA. QazAqparat - «Teńizshevroıl» JShS (TShO) bolashaqta damytý jobasynda tabıǵı resýrstardy únemdeý maqsatynda aınalmaly sýmen qamtý júıesi qoldanylatyn bolady. Bul týraly búgin ótken dóńgelek ústel otyrysynda QR Qorshaǵan orta jáne sý resýrstary mınıstri Nurlan Qapparov aıtty.
«Biz Mınıstrlik retinde TShO-ny damytý josparyna aınalmaly sýmen qamtý jobasyn engizýdi talap etip qoıdyq. Endi óndiriske qoldanylǵan sý qaıta óńdelip, óndiris qajettiligine taǵy da jaratylatyn bolady», - dedi N. Qapparov.
Onyń aıtýynsha, búginde álem boıynsha sý resýrstarynyń tapshylyǵy anyq biline bastady. «Sondyqtan biz sýdy únemdeýdiń barlyq joldaryn qarastyrýǵa tıispiz. Mundaı jaǵdaıda óndiris oryndaryna qoldanylǵan sýdy qaıta óńdep paıdalaný júıesin jan-jaqty jetildirý qajet», - dedi ol.
Mınıstrlik mundaı tájirıbeni basqa da óndiris oshaqtaryna engizýdi josparlap otyr. Vedomstvo basshysynyń málimetinshe, osyǵan uqsas júıe Balqash JES-inde de salynady.
«Biz mundaı jumystardy zańnamalyq turǵyda bekitýimiz qajet. Degenmen, óndiris oryndaryna da tıimdilik jaǵyn qarastyrý kerek», - dep atap ótti N. Qapparov.
Aıta keteıik, TShO-ny damytý jobasy 2018 jyly munaı óndirý kólemin jylyna 38 mln. tonnaǵa deıin kóbeıtýge jol ashady. 2018 jyldyń orta tusynda bitirý josparlanǵan jobanyń jalpy quny 23 mlrd. dollarǵa baǵalanyp otyr. 1979 jyly ashylǵan «Teńiz» ken orny - búginde álemdegi eń tereńde ornalasqan ári eń baı kózderdiń biri. 1993 jyly Qazaqstan úkimeti men «Chevron» korporatsııasy arasynda kelisimge qol qoıylyp, «Teńizshevroıl» JShS qurylǵan bolatyn. Qazirgi kezde TShO-nyń áriptesteri Chevron - 50%, «QazMunaıGaz» - 20%, ExxonMobil - 25% jáne LukArco - 5% kompanııalary bolyp tabylady.
