TShO, Kaspıı munaı, Mańǵystaýmunaıgaz jáne NCOC–ke qomaqty somada aıyppul salyndy

ASTANA. KAZINFORM – Ekologııa jáne tabıǵı resýrstar mınıstrligi munaı óndirýshi birneshe komnanııaǵa qomaqty somada aıyppul saldy. Bul týraly Úkimet basshysy Oljas Bektenovtiń Májilis depýtattarynyń saýalyna joldaǵan jaýabynan málim boldy. 

Premer-mınıstr Úkimet ekonomıkalyq damý men qorshaǵan ortany qorǵaý arasyndaǵy balansty qamtamasyz ete otyryp, tabıǵatty qorǵaý zańnamasyn jetildirý boıynsha júıeli jumysty atqaryp kele jatqanyn aıtyp otyr. Ekologııalyq kodekste óndiristik qýattardy jańǵyrtý jáne I sanattaǵy kásiporyndardy baqylaýdyń avtomattandyrylǵan júıelerin engizý kózdelgen. Ozyq tehnologııalardy paıdalana otyryp, keshendi ekologııalyq ruqsatnamalar júıesi engizildi.

Talaptar oryndamaǵan kezde aıyppul men jáne emıssııalar úshin mólsherlemeni 2, 4 jáne 8 esege ósirý qarastyrylǵan, sondaı-aq shyǵaryndylar normatıvterin asyrǵany úshin jaýapkershilikti kúsheıtý eskerilgen.

— Máselen, Ekologııa jáne tabıǵı resýrstar mınıstrligi 2022-2024 jyldary ekologııa talaptaryn buzǵany úshin «Teńizshevroıl» jaýapkershiligi shekteýli seriktestiginen 2,8 mlrd teńgeden astam, «Nort Kaspıan Opereıtıng Kompanı N.V.» kompanııasynan 12,4 mlrd teńgege jýyq ákimshilik aıyppul óndirdi. Sonymen qatar, byltyr «Kaspıı munaı» AQ (13,7 mlrd teńge) jáne «Mańǵystaýmunaıgaz» AQ (32,2 mlrd teńge) ekologııalyq zańnamany buzǵany úshin jaýapkershilikke tartyldy, — dep jazdy Oljas Bektenov.

Budan buryn habarlanǵandaı, OPEK+ munaı kólemin naryqqa kezeń-kezeńimen qaıtarýdyń kestesine túzetý engizedi.