TShO 2014 jyldyń 1 jartyjyldyǵynda 13 mln. tonna munaı óndirdi
ASTANA. QazAqparat - «Teńizshevroıl» aǵymdaǵy jyldyń 1 jartyjyldyǵynda 13 mln. tonna munaı óndirdi, dep habarlady atalǵan kompanııanyń baspasóz qyzmetinen.
«2014 jyldyń birinshi jartysynda munaı óndirý kólemi 13 mıllıon tonnany (104 mıllıon barrel) qurady. TShO munaıdy birneshe tasymaldaý baǵyttary boıynsha eksportqa shyǵarady. Atap aıtqanda, shıki munaıdy Kaspıı qubyry kontsortsıýmy arqyly Novorossııskige jáne temir jolmen Odessa, Taman, Aqtaýǵa, ári qaraı Batýmı, Kýlevıge eksportqa jiberedi», - delingen habarlamada.
Sondaı-aq TShO suıytylǵan gaz satý kólemin 627 myń tonnaǵa, al qurǵaq gaz satý kólemin 3,3 mıllıard tekshe metrge jetkizgen. Budan bólek kompanııa 1,8 mıllıon tonna kúkirt satqan, bul atalǵan kezeńdegi óndirilgen 1,1 mıllıon tonna kúkirttiń 166 paıyzyn quraıdy. 2014 jyldyń 30 maýsymyndaǵy málimetke sáıkes, kúkirtti satý baǵytyndaǵy tabysty jumys nátıjesinde Teńiz ken ornyndaǵy saqtalǵan kúkirt kólemi 450 myń tonnaǵa deıin azaıtylǵan.
«Teńizshevroıl joǵary sapaly kúkirttiń tórt túrin, eń aldymen, Jerorta teńizi basseıni men Orta Azııa elderindegi tutynýshylarǵa jáne Qazaqstan, Reseı, Ýkraına, Qytaıǵa jetkizýde», - delingen kompanııa aqparatynda.
