Tserebraldy sal aýrýy bar patsıentter medıtsınalyq kómek pen dári-dármekti burynǵy kólemde alady
ASTANA.KAZINFORM — Densaýlyq saqtaý mınıstrligi jańartylǵan medıtsınalyq kómek paketinde tegin medıtsınalyq kómek pen dári-dármekpen qamtamasyz etýdiń barlyq kepildikteri saqtalatynyn habarlady.
2026 jylǵy 1 qańtardan bastap Qazaqstan Medıtsınalyq kepildikterdiń biryńǵaı paketine kóshedi. Sozylmaly aýrýlary bar barlyq patsıentter emdeýdi jáne dári-dármekterdi burynǵy kólemde qabyldaýdy jalǵastyrady — ózgerister densaýlyq saqtaý júıesin ádil, turaqty jáne barlyǵyna qoljetimdi etýge baǵyttalǵan.
Esterińizge sala keteıik, 2025 jylǵy 14 shildede «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý jáne medıtsınalyq qyzmetter kórsetý máseleleri boıynsha ózgerister men tolyqtyrýlar engizý týraly» Zań qabyldandy.
Zań mindetti áleýmettik medıtsınalyq saqtandyrý (MÁMS) júıesiniń tıimdiligin arttyrýǵa jáne halyqty medıtsınalyq kómekpen barynsha qamtýǵa baǵyttalǵan.
Memleket basshysynyń tapsyrmasy boıynsha óńirlerge azamattardyń áleýmettik osal sanattaryn (D jáne E sanattary) saqtandyrýǵa múmkindik beretin qarjylyq tetikterdi kózdeıtin normalar alǵash ret engizilýde. Bul qosymsha 1 mln-nan astam azamattyń medıtsınalyq kómekke qoljetimdiligin qamtamasyz etýge múmkindik beredi.
Memleket, burynǵydaı, azamattardyń barlyq jeńildetilgen sanattaryna, sonyń ishinde balalarǵa, júkti áıelderge, zeınetkerlerge, stýdentterge, múgedektigi bar adamdarǵa jáne jumyssyzdarǵa qatysty óz kepildikterin saqtaıdy — bul jalpy alǵanda 11 mıllıonnan astam qazaqstandyq, onyń ishinde BTsS bar barlyq patsıentterge qatysty.
Aıta keteıik, qant dıabeti men DTsP áleýmettik aýrýlar tiziminen alynyp tastaldy.