Tserebraldy sal aýrýy bar balalarda reabılıtatsııa nátıjesin qalaı saqtaý kerek

ASTANA. KAZINFORM – Tserebraldy sal aýrýy bar balanyń anasy Ánel Nuǵmanova men 20 jyldan astam tájirıbesi bar reabılıtolog-dáriger Sáken Temirqulov reabılıtatsııadan keıingi nátıjeni qalaı saqtap, odan ári damytý kerektigi jóninde keńes berdi.

Ádette qozǵalys buzylystary bar balalar úshin reabılıtatsııa kýrsy eki aıǵa jýyq ýaqytqa sozylady. Áıel Nuǵmanovanyń aıtýynsha, TsSA, ınsýlt saldary, gıpoksııa, bas-mı jaraqaty sııaqty jaǵdaılarda qozǵalys fýnktsııalaryn qalpyna keltirýge bolady. Alaıda, eń mańyzdysy – nátıjeniń joǵalyp ketpeýine jol bermeý.

Áneldiń sózinshe, kýrs aıaqtalǵan soń da jattyǵýdy toqtatpaý qajet. Tipti kúnde nemese aptasyna birneshe ret qarapaıym jattyǵýlardy oryndaý – bulshyqetterdiń qozǵalysyn saqtaýdyń negizgi joly. Eń bastysy, derttiń qaıta kúsheıýine jol bermeý.

«Kóp ata-ananyń jiberetin qatesi – olar birtindep úmitin úzip, balaǵa jattyǵýdy toqtatady. Qozǵalys buzylystary bar adamdardyń, tek balalardyń emes, eresekterdiń de ómir sapasyn jaqsartý múmkindigi qaı kezde de bar. Reabılıtatsııanyń máni – kúndelikti eńbekte. Qımylsyzdyqty azaıtyp, bulshyq et pen sińirdi durys jumys isteýge úıretý kerek. Eger bala kún saıyn 20-40 ret qolyn búgip, aıaǵyn sozyp, arqa bulshyqetterin jattyqtyryp otyrsa, ýaqyt óte kele ol muny ózdiginen jasaı bastaıdy», – deıdi ol.

Reabılıtolog Sáken Temirqulov ta reabılıtatsııadaǵy negizgi qaǵıdattardy atap ótti. Ol motorlyq fýnktsııany qalpyna keltirý arnaıy qurylǵylar arqyly birtindep júretinin aıtady.

«Bul ádistiń negizinde afferenttik júıe jatyr, biz kún saıyn bulshyqetter men sińirlerge áser etkende, mı qozǵalys sıgnaldaryn durys qabyldaı bastaıdy. Qaıta-qaıta jattyqtyrý arqyly qurysý azaıady, sińirler ıkemdeledi, qozǵalys daǵdylary birtindep qalpyna keledi. Eń mańyzdysy – úzilissiz, turaqty jumys», – dep túsindirdi Sáken Temirqulov.

Eske salaıyq, reabılıtologter tserebraldy sal aýrýy bar 12 jasar balany aıaǵynan turǵyzyp, tusaýyn kesti.