«TsentrKredıt» banki klıenttiń fotogalereıasy men densaýlyq derekteri ne úshin suralatynyn túsindirdi
ASTANA. KAZINFORM — Áleýmettik jelide «TsentrKredıt» banki óz klıentteriniń fotogalereıasy men densaýlyq derekterine qyzyǵýshylyq tanytqany synǵa ushyrady.
Atap aıtqanda, galereıaǵa, mıkrofonǵa, kontaktilerge qol jetkizý, sondaı-aq klıentterdiń densaýlyq jaǵdaıy týraly, onyń ishinde dıspanserlerden alynatyn málimetter jınalatyny aıtylǵan. Budan bólek, klıentti skorıngten ótkizip, baǵalaý maqsatynda mobıldi operatorlar arqyly klıenttiń tsıfrlyq júris-turysy qaralatyny da jazylǵan. Máseleniń mán-jaıyn banktiń ózi túsindirdi.
Qarjylyq uıymnyń aıtýynsha, banktiń mobıldi qosymshasy keıbir múmkindikterdiń jumys isteýi úshin telefonnyń túrli fýnktsııalaryna qol jetkizýdi suraıdy. Galereıaǵa qol jetkizý profılge jeke fotosýret ornatý, sondaı-aq nesıege nemese ózge qyzmetterge ótinish berý kezinde úzindi kóshirmelerdi jáne basqa faıldardy júkteý úshin qajet. Al mıkrofondy paıdalaný ruqsaty qosymsha arqyly qoldaý qyzmetine tikeleı qońyraý shalý múmkindigin qamtamasyz etedi.
— Telefon kitapshasyndaǵy nómirler — aýdarym jasaý kezinde yńǵaılylyq úshin qoldanylady, qarajat alýshyny birden telefon kitapshasynan tańdaýǵa bolady, nómirdi qolmen engizýdiń qajeti joq. Sondaı-aq, geolokatsııa — eń jaqyn bólimsheler men bankomattardy kartadan kórsetýge jáne marshrýt qurýǵa qajet. Bul ruqsattardyń barlyǵy naqty fýnktsııalarǵa baılanysty, sondyqtan paıdalanýshy óz qalaýynsha olardy bermeýge nemese tek shyn máninde qajet bolǵan kezde ǵana qosýǵa quqyly, — dep jazylǵan banktiń resmı jaýabynda.
Bank klıentterdiń derbes derekterin Qazaqstan Respýblıkasynyń zańnamasyna qatań sáıkes jáne tek bank pen ilespe qyzmetterdi kórsetý maqsatynda jınaıdy jáne paıdalanady. Bul málimetter klıentti sáıkestendirý, onyń otbasylyq jáne áleýmettik mártebesin rastaý, tólem qabiletin baǵalaý, bank jáne saqtandyrý ónimderin rásimdeý úshin qajet.
Al densaýlyq jaǵdaıy men áleýmettik mártebege qatysty derekter tek tıisti qyzmetterdi kórsetýge tikeleı baılanysty bolǵanda ǵana, mysaly saqtandyrý nemese jeńildik baǵdarlamalary aıasynda suratylady. Bul aqparat memlekettik organdarǵa, qorlarǵa jáne banktiń seriktesterine tek zańnamada belgilengen shekte, sharttyq mindettemelerdi oryndaý men mindetti tekserý júrgizý maqsatynda ǵana berilýi múmkin.
— Derekterdi berýde banktiń, medıtsınalyq jáne saqtandyrý qupııasyn saqtaý talaptary qatań saqtalady. Bank derekterdi bógde maqsattarda paıdalanbaıdy jáne olardy úshinshi tulǵalarǵa zańsyz bermeıdi, olardyń qupııalylyǵy men qaýipsizdigin qamtamasyz etedi. Jeke derekterdi óńdeý klıenttiń kelisimimen júrgiziledi, al bul kelisimdi belgilengen tártippen keri qaıtaryp alýǵa bolady, — deıdi «TsentrKredıt» banki.
Kredıttik bıýrolar men memlekettik derekqorlardan alynatyn málimetter klıenttiń jeke basyn tekserý, kredıttik tarıhyn jáne qarjylyq minez-qulqyn taldaý úshin paıdalanylady.
Al uıaly baılanys operatorlarynan alynatyn aqparat skorıng maqsatynda qoldanylady. Telefon nómiri paıdalaný merzimi, klıentke tirkelýiniń turaqtylyǵy jáne belsendilik deńgeıi sekildi tehnıkalyq kórsetkishter boıynsha baǵalanady. Qońyraýlar men habarlamalar mazmunyna taldaý jasalmaıdy. Jınalǵan derekter klıenttik reıtıngti qalyptastyrý men bank qyzmetterin usyný, olardyń sharttary boıynsha sheshim qabyldaý úshin qoldanylady.
Aıta keteıik, búgin Úkimet otyrysynda Premer-mınıstr Oljas Bektenov aqparattyq júıelerdi memlekettik Tier-III deńgeıindegi derekterdi óńdeý ortalyǵyna kóshirýdi tapsyrdy.